काठमाडौं । धरहरा सञ्चालनमा आएको करिब एक सातामा १४ लाख ७० हजार भन्दा बढी राजस्व सङ्कलन भएको छ। २०७२ को भूकम्पले पूर्ण क्षति भएपछि पुनः निर्माण भएको ऐतिहासिक धरहरा यही मङ्सिर ९ गतेदेखि सर्वसाधारणका लागि खुला गरिएको थियो ।
आइतबार साँझसम्म धरहराबाट १४ लाख भन्दा बढी राजस्व सङ्कलन भएको हो । बुधवार बाहेक हरेक दिन सञ्चालन हुने उक्त धरहरामा दैनिक एक हजार भन्दा बढीले धरहरा चढ्ने गरेको निर्माण समितिले जनाएको छ।
धरहरा चढ्न प्रतिव्यक्ति दुई सय शुल्क तोकिएको छ। विद्यार्थी, ज्येष्ठ नागरिक, बालबालिका अपाङ्गता भएका व्यक्तिहरूले ५० प्रतिशत छुटमा धरहरा चढ्न पाउनेछन् । सार्क राष्ट्रबाट आउने पर्यटकलाई प्रतिव्यक्ति पाँच सय र सार्कबाहेक राष्ट्रलाई प्रतिव्यक्ति एक हजार शुल्क तोकिएको छ ।
यहाँ पार्किङ गर्दा चार पाङ्ग्रेका लागि प्रतिघण्टा २० र दुई पाङ्ग्रेलाई १० तोकिएको छ। यस्तै, धरहरा परिसरमा प्रवेशका लागि भने ५० निर्धारण गरिएको बताइएको छ । धरहरा स्तम्भमा राष्ट्रिय महत्वका विज्ञापन गर्न प्रतिघण्टा पाँच हजार तोकिएको छ ।
