काठमाडौँ। गत असोज १० र ११ गते आएको बाढी पहिरोको कारण नेपालमा सञ्चालित निर्जीवन बीमा कम्पनीमा १२ अर्ब २६ करोड चार लाख रुपैयाँ बराबरको दाबी परेको छ। यो मंसिर १२ गतेसम्म परेको दाबीको आँकडा हो ।
नेपाल बीमा प्राधिकरणले सार्वजनिक गरेको तथ्यांक अनुसार हाल कम्पनीहरूमा प्राप्त विवरणबाट तीन हजार ५२९ वटा दाबी परेका छन्। यो १४ वटा निर्जीवन बीमा र चार वटा लघुबीमाको विवरण हो ।
त्यस्तै, निर्जीवन बीमा कम्पनीहरूले मंसिर १२ गतेसम्मको अवधिमा ७८ करोड ९३ लाख रुपैयाँ बराबर एक हजार २१५ वटा दाबी भुक्तानी गरेको सार्वजनिक तथ्यांकमा उल्लेख छ । यस अवधिमा सर्वाधिक दाबी भुक्तानी गर्नेमा शिखर इन्स्योरेन्स रहेको छ । कम्पनीले २७ करोड ६ लाख रुपैयाँ भुक्तानी गरेको छ ।
त्यस्तै, यस अवधिमा सिद्धार्थ प्रिमियर इन्स्योरेन्समा दुई अर्ब ५९ करोड रुपैयाँको दाबी परेको छ । कम्पनीमा हालसम्म ५०५ वटा दाबी परेका छन् । जसमा कम्पनीहरूले १३ करोड ६७ लाख रुपैयाँको दाबी भुक्तानी गरेको छ ।
३५ सय २९ जनाको दाबी परेकोमा हालसम्म ७८ करोड बढीको भुक्तानी भएको छ । यो अवधिमा दि ओरिएन्टल इन्स्योरेन्स कम्पनीले दुई करोड एक लाख रुपैयाँको बीमा दाबी भुक्तानी गरेको छ ।भने सगरमाथा लुम्बिनी इन्स्योरेन्सले सात करोड २३ लाख रुपैयाँको दाबी भुक्तानी वितरण गरेको छ ।
त्यस्तै, बाढी पहिरोको क्षतिले शिखर इन्स्योरेन्समा ४५७ वटा दाबी बापत एक अर्ब १० करोड रुपैयाँको दाबी परेको छ । जसमा कम्पनीले २७ करोड रुपैयाँको दाबी भुक्तानी गरिसकेको छ । हिमालयन एभरेष्टमा एक करोड रुपैयाँ बराबरको २४६ वटा दाबी बापत एक अर्ब १० करोड रुपैयाँको दाबी परेको छ । यस अवधिमा कम्पनीले आठ करोड ५३ लाख रुपैयाँ बराबरको दाबी भुक्तानी गरेको छ ।
त्यस्तै, नेको इन्स्योरेन्समा २१९ वटा बीमा दाबी बापत ७६ करोड रुपैयाँको दाबी परेको छ । यस अवधिमा कम्पनीले ६ करोड ९० लाख रुपैयाँको दाबी भुक्तानी गरेको छ । प्रभु इन्स्योरेन्समा २० करोड रुपैयाँ र सरकारी स्वामित्वको राष्ट्रिय बीमा कम्पनीमा २० करोड रुपैयाँको बीमा दाबी परेको छ । जसमा सरकारी कम्पनीको धाक लगाउँदै आएको राष्ट्रिय बीमा कम्पनीले कुनै पनि बीमा दाबी भुक्तानी नदिँदासमेत नियमनकारी निकाय बीमा प्राधिकरण मौन रहेको देखिन्छ।
