काठमाडौँ । नेपाल राष्ट्र बैंकले ९ खर्ब २७ अर्ब रुपैयाँ बढी धितो पत्रमा लगानी गरेको छ। बैंकले विदेशमा रहेका विभिन्न धितो पत्र खरिदमा उत्तः लगानी गरेको उल्लेख छ ।
जेठ मसान्तसम्मका डाटा अनुसार कुल ९ खर्ब २७ अर्ब ७२ करोड ४८ लाख ४७ हजार ३७९ रुपैयाँ धितो पत्र लगानी भएको छ । पछिल्लो ११ महिनामा मात्रै केन्द्रीय बैंकले २ खर्ब ६७ अर्ब रुपैयाँ लगानी गरेको जनाएको छ ।
गत आर्थिक वर्षसम्ममा बैंकको धितो पत्रमा ६ खर्ब ६० अर्ब ३४ करोड ९५ लाख ५ हजार ५७१ रुपैयाँ लगानी थियो । यस्तै निश्चित समयावधिका लागि गरिने आवधिक निक्षेपअन्तर्गत राष्ट्र बैंकले कुल ६ खर्ब ४१ अर्ब रुपैयाँ विदेशी बैंकमा राखेको छ।
गत असार मसान्तसम्म ५ खर्ब २२ अर्ब रुपैयाँ टर्म डिपोजिटको रूपमा बैंकले विदेशमा रहेको बैंकमा निक्षेपमा रकम राखेको थियो । यसैगरी राष्ट्र बैंकले ८० अर्ब २१ करोड रुपैयाँ सुनमा लगानी गरेको छ। चालू आवको ११ महिनामा सुनमा रहेको लगानी १३ अर्ब ८७ करोड रुपैयाँले बढेको हो।
