काठमाडौँ। पुष १२ गते बिहीबारदेखि काठमाडौँको भृकुटीमण्डपमा आठौँ रियल इस्टेट एक्स्पो हुने भएको छ । नेपालमा आवास तथा जग्गा विकासकर्ताहरूको प्रतिनिधित्व गर्ने मुख्य संस्था नेपाल जग्गा तथा आवास विकास संघले पुस १२ देखि १५ सम्म रियल इस्टेट एक्स्पो सञ्चालन गर्न लागेको हो ।
यस पटकको मेलाले सर्वसाधारण सबैमा घरजग्गा व्यवसायको वर्तमान अवस्था तथा यसका समस्या र समाधानका उपायसहित भावी अवसरका विषयमा समुचित सूचना तथा जानकारी उपलब्ध गराई व्यवसायलाई समय साक्षेप विकास एवं विस्तार गर्न योगदान पुऱ्याउने अपेक्षा गरिएको आयोजकको भनाई छ ।
नयाँ नेपाल निर्माणको लागि वैज्ञानिक, व्यवस्थित एवं सुरक्षित जग्गा विकास तथा शहरीकरणमा महत्वपूर्ण योगदान पुऱ्याइरहेका व्यवसायीहरू र यसका उपभोक्ताहरूलाई एकै थलोमा भेला गराई व्यवसायीहरूले आफ्नो नवीनतम उत्पादन उपभोक्तामाझ पुऱ्याउन यस मेलाबाट जानकारी लिन सकिने आयोजकको भनाई छ।
आठौँ पटकको मेलामा स्वदेशी तथा विदेशी प्रदर्शकहरूले आ(आफ्ना सेवा तथा उत्पादनहरूको प्रदर्शन गर्नेछन् । यस मेलामा भूकम्प प्रतिरोधी घर तथा अपार्टमेण्ट, जग्गा योजना तथा विकास, निर्माण सामग्रीका उत्पादक तथा विक्रेता, इन्जिनियरिङ तथा आर्किटेक्चर कन्सल्ट्यान्टका साथै बैंक र बीमा कम्पनीहरु सहभागी हुनेछन् ।
मेलामा विद्युतीय सरसामानहरू, फर्निचर, पाइप, सेनिटरी वयर्स फिटिङ, पेन्टस्, सवारी साधन, सजिसजावटका सामान र बीमा, बैंकिङ्ग तथा वास्तुकला जस्ता व्यवसायमा संलग्न व्यवसायीहरूले आ(आफ्ना उत्पादनहरु प्रदर्शन गरी सो सम्बन्धी परामर्श सेवा समेत उपलब्ध गराउनेछन् ।
साथै, इच्छुक सहभागीहरूले मेला अवधिमा नै आफ्नो उत्पादन तथा सेवाहरूको शुभारम्भ गर्न चाहेमा सोको समेत व्यवस्था गरिने संघले जनाएको छ । मेलाबाट घरजग्गा तथा अपार्टमेण्टहरु खरिद र बिक्रीमा संलग्न सरोकारवाला तथा दर्शकहरूले सुरक्षित एवं ब्यवस्थित बसोबासको विकास र मूल्य प्रतिस्पर्धा मार्फत उचित मूल्यमा घरजग्गा तथा अपार्टमेण्टहरु बिक्री सम्बन्धमा एकै थलोबाट विस्तृत जानकारी प्राप्त गर्न सक्नेछन् ।
घर घडेरी तथा संयुक्त आवास आयोजनामा संलग्न व्यवसायी, लगानीकर्ता, सेवाग्राही उपभोक्ता, निर्माण सामग्री विक्रेता तथा सेवा प्रदायक संस्थाहरूका लागि यो मेला एउटा साझा मञ्च बन्ने विश्वास लिएको छ । सेवाग्राहीको इच्छा एवं छनोटको आधारमा समुचित मूल्यमा घरजग्गा उपलब्ध हुने गरी कारोबारलाई सरल, सुलभ तथा व्यवस्थित बनाउन यो मेला निकै उपयोगी हुनेछ संघको दाबी छ । मेलाबाट २ अर्ब ५० करोड रुपैयाँको कारोबार हुने अपेक्षा गरेको छ ।
मेलामा कम्तीमा ६० हजार भन्दा बढी दर्शकहरूले अवलोकन गर्ने आयोजकको अपेक्षा छ । अवलोकनका लागि निः शुल्क पासको व्यवस्थापन गरिएको छ । साथै, हालसम्ममा ६० भन्दा बढी स्टलहरू रहने अपेक्षा गरिएको छ ।
