काठमाडौं । अर्थमन्त्री डा. स्वर्णिम वाग्लेले नेपालको अर्थतन्त्रलाई आयातमा निर्भर उपभोगमुखी संरचनाबाट उत्पादन र निर्यातमुखी दिशातर्फ रूपान्तरण गर्न उद्योग क्षेत्रले अग्रसर भूमिका खेल्नुपर्ने बताएका छन्।
मंगलबार सिंहदरबारमा उद्यमीहरूसँगको छलफलमा उनले सरकार र निजी क्षेत्रबीच सहकार्यमार्फत लामो समयदेखि खस्किएको औद्योगिक क्षेत्रलाई पुनर्जीवित गर्न आवश्यक रहेको उल्लेख गरे।
अर्थमन्त्री वाग्लेले निजी क्षेत्रको लगानी सुरक्षित हुने, उचित प्रतिफल प्राप्त हुने र पुनः लगानी गर्ने वातावरण सुनिश्चित गर्न सरकार प्रतिबद्ध रहेको बताए।
उनका अनुसार चालु आर्थिक वर्षको बजेटमार्फत घोषणा गरिएका सुधार कार्यक्रमहरू कार्यान्वयनको चरणमा अघि बढिरहेका छन्। पूँजीगत खर्च वृद्धि, आयोजना कार्यान्वयन तीव्रता, पूँजी बजार सुधार, वित्तीय प्रणाली सुदृढीकरण र लगानीमैत्री वातावरण निर्माणमा सरकार सक्रिय रहेको उनले बताए।
उनीले नेपाललाई लगानी र व्यवसायका लागि आकर्षक गन्तव्य बनाउने लक्ष्यसहित उद्योग, उत्पादन विस्तार र रोजगारी सिर्जनामा निजी क्षेत्रलाई अघि बढ्न आग्रह गरे। साथै, लगानीमा देखिएका अवरोध हटाउँदै दीर्घकालीन आर्थिक विकासतर्फ सहकार्य गर्न उनले जोड दिए।
