काठमाडौँ । स्वदेशमा बेरोजगार र आर्थिक मन्दीको प्रभाव बढेसँगै सङ्ख्या बढेसँगै नेपालबाट रोजगारीका लागि विभिन्न देशमा जाने नेपालीको सङ्ख्या दैनिक रूपमा बढेको छ । मासिक रूपमा औसत ६५ हजार ५ सय ११ युवा विदेशिने गरेको वैदेशिक रोजगार विभागको तथ्यांकले देखाएको छ ।
चालु आर्थिक वर्ष २०८१/८२ को पहिलो ६ महिनाको अवधिमा ३ लाख ९३ हजार ६७ जनाले श्रम स्वीकृति लिएका छन्। जस अनुसार मासिक साढे ६५ हजार युवा रोजगारीको सिलसिलामा विदेश उड्ने गरेको देखिएको छ।
वैदेशिक रोजगार विभागका अनुसार पुस २०८१ मा मात्र ६७ हजार २ सय ५८ युवाले श्रम स्वीकृति लिएका छन् । तीमध्ये ७ हजार १ सय ५ महिला छन् । पुस मसान्तसम्म २ लाख २५ हजार ६ सय २५ नयाँ श्रम स्वीकृति र १ लाख ६२ हजार ६ सय २८ पुनः श्रम स्वीकृतिमा विदेश गएका छन् ।
नेपालीको प्रमुख गन्तव्य युएई
६ महिनाको अवधिमा नेपालीको प्रमुख गन्तव्यको रूपमा युनाइटेड अरब इमिरेट्स ९युएई० देखिएको छ। उक्त देशमा पुस महिनामा मात्रै २१ हजार १ सय २१ जनाले श्रम स्वीकृति लिएका छन् । ईपीएस कोरिया र इजरायलमा भने कुल ४ हजार ८ सय १४ युवा गएको तथ्यांकमा देखिन्छ ।
साथै, साउदी अरब १३ हजार ६ सय ४२, कतार ११ हजार ९ सय ८३ , कुवेत ६ हजार ५०, मलेसिया ३ हजार १ सय ७५, जापान १ हजार ९ सय ४६ र क्रोएसियाका लागि १ हजार १ सय ३४ जनाले श्रम स्वीकृति लिएका छन्।
पछिल्लो ६ महिनाको तथ्यांक हेर्दा युएईमा मात्र १ लाख २२ हजार ८ सय २९ जना देखिन्छ। यो सङ्ख्या कुल कामदारको ३१.२४ प्रतिशत हो । युएईमा साउनमा १७ हजार ५ सय ४१, भदौ १८ हजार ६ सय ५, असोज १७ हजार ७ सय २४, कात्तिक २३ हजार ६९, मंसिर २४ हजार ७ सय ६९ र पुसमा २१ हजार २ सय ११ जना गएका छन् ।
पुससम्म वैदेशिक रोजगार विभागमा कुल ९ सय ५४ उजुरी परेका थिए । तीमध्ये ६४ वटा उद्धार गरिएको र ४ सय १९ मा क्षतिपूर्ति तिराइएको विभागको तथ्यांक छ ।
