काठमाडौं । अपर हेवाखोला हाइड्रोपावर कम्पनीले हकप्रद सेयर निष्काशनका लागि विद्युत नियमन आयोगबाट पूर्वस्वीकृति पाएको छ।
आयोगले भदौ ८ गते कम्पनीलाई हकप्रद निष्काशनका लागि पूर्वस्वीकृति दिएको हो। कम्पनीले हाल कायम चुक्ता पुँजीको एक बराबर एक अर्थात् १०० प्रतिशत हकप्रद सेयर निष्काशन गर्न अनुमति मागेको थियो।
कम्पनीले मातृभूमि हाइड्रोपावरले अघि बढाइरहेको १५ मेगावाट क्षमताको सिसुवा खोला जलविद्युत आयोजनामा लगानी गर्न तथा ८.५ मेगावाट क्षमताको अपर हेवाखोला साना जलविद्युत आयोजना निर्माणका क्रममा बैंक तथा वित्तीय संस्थाबाट लिएको ऋणको भार घटाउन हकप्रद निष्काशन गर्न खोजेको हो।
तर, कम्पनीले शतप्रतिशत हकप्रद माग गरे पनि विद्युत नियमन आयोगले ९१.३० प्रतिशत हकप्रद निष्काशनका लागि मात्र पूर्वस्वीकृति दिएको छ।
अब कम्पनीले हकप्रद सेयर निष्काशनको अनुमति माग गर्दै नेपाल धितोपत्र बोर्डमा आवेदन दिनेछ। बोर्डबाट स्वीकृति प्राप्त भएपछि मात्रै कम्पनीले हकप्रद सेयर निष्काशन तथा बिक्री प्रक्रिया अघि बढाउनेछ।
