काठमाडौँ । टोखा नगरपालिका–५ बसुन्धारामा रहेको एक गार्मेन्ट उद्योगमा बुधबार बिहान भीषण आगलागी हुँदा ठूलो आर्थिक क्षति भएको छ ।
बसुन्धारास्थित सिद्धबाबा युनिफर्म इन्टरप्राइजेजमा विद्युत् सर्टका कारण आगो लागेको प्रारम्भिक अनुमान गरिएको छ । करिब राति २ः५२ बजे सुरु भएको आगलागीले चाँडै उग्र रूप लिँदा उद्योगभित्रका सामग्री पूर्ण रूपमा जलेर नष्ट भएका छन् ।
घटनाको खबर पाएलगत्तै नेपाल प्रहरी, नगर प्रहरी, स्थानीय बासिन्दा तथा सम्बन्धित निकायहरू आगो नियन्त्रणमा खटिएका थिए ।
आगलागीबाट गार्मेन्ट उद्योग पूर्ण रूपमा ध्वस्त हुनुका साथै करिब ८ करोड रुपैयाँ बराबरको क्षति भएको अनुमान गरिएको छ । आगो छेउछाउका अन्य व्यवसाय तथा घरमा समेत फैलिँदा थप नोक्सानी भएको छ ।
प्रहरीका अनुसार अन्नपूर्ण किराना स्टोर र प्रतीक्षा इलेक्ट्रोनिक्समा ठूलो क्षति पुगेको छ भने लुम्बिनी खाजा घर, क्यापिटल इन्टरनेशनल मेनपावर र आसपासका केही घरमा आंशिक असर परेको छ ।
यस घटनामा कुनै मानवीय क्षति नभए पनि भौतिक रूपमा ठूलो क्षति भएको छ । घटनाबारे थप अनुसन्धान जारी रहेको प्रहरीले जनाएको छ ।
