काठमाडौं । नेपाल इन्स्योरेन्स कम्पनीले आर्थिक वर्ष २०८२।८३ को दोस्रो त्रैमाससम्मको अपरिष्कृत वित्तीय विवरण प्रकाशन गरेको छ ।
वित्तीय विवरण अनुसार यस अवधिमा कम्पनीले ९८ करोड ११ लाख रुपैयाँ कुल बीमाशुल्क आर्जन गरेको छ । अघिल्लो वर्षको सोही अवधिमा कम्पनीले ८१ करोड ६४ लाख कुल बीमाशुल्क आर्जन गरेको थियो।
यस्तै यस अवधिमा कम्पनीले ५२ करोड रुपैयाँ खुद बीमाशुल्क आर्जन गरेको छ। अघिल्लो आर्थिक वर्षको तुलनामा समीक्षा वर्षमा खुद बीमाशुल्क आर्जन ५८ प्रतिशतले बढेको हो । अघिल्लो वर्षको सोही अवधिमा कम्पनीले ३२ करोड ८३ लाख रुपैयाँ खुद बीमाशुल्क आर्जन गरेको थियो।
यस अवधिमा कम्पनीले ४९ लाख ५८ हजार रुपैयाँ खुद नाफा आर्जन गरेको छ । अघिल्लो आर्थिक वर्षको सोही अवधिमा कम्पनीले ८ करोड ६० लाख रुपैयाँ खुद नाफा आर्जन गरेको थियो । अघिल्लो वर्षको तुलनामा कम्पनीको नाफा ९४ प्रतिशतले घटेको हो । जेन जी आन्दोलन र असोजमा भएको बाढी पहिरोका कारण ठूलो संख्यामा बीमा दाबी दाबी परेको कारण नाफा प्रभावित भएको हो।
समीक्षा अवधिमा कम्पनीले पुनर्बीमा मार्फत ४६ करोड १० लाख रुपैयाँ खर्चिएको छ । गत आवको सोही अवधिमा कम्पनीले पुनर्बीमा मार्फत ४८ करोड ८० लाख रुपैयाँ खर्चिएको थियो ।
यस अवधिमा कम्पनीको प्रतिशेयर आम्दानी ०.३९ रहेको छ । प्रतिशेयर नेटवर्थ १७० रुपैयाँ ११ पैसा रहेको छ । २ अर्ब ५४ करोड शेयर पूँजी भएको कम्पनीको चालु आर्थिक वर्षको दोस्रो त्रैमासमा स्पेसल रिजर्भमा १ अर्ब ५१ करोड ८६ लाख रुपैयाँ रहेको छ । यस अवधिमा रिटेन्ड अर्निङमा ४१ लाख ७९ हजार रहेको छ । अन्य इक्विटीमा ७ करोड १ लाख रहेको छ ।
अघिल्लो वर्ष असार मसान्तसम्ममा स्पेसल रिजर्भमा १ अर्ब ५१ करोड ६१ लाख रुपैयाँ थियो । रिटेन्ड अर्निङमा १६ करोड २९ लाख रुपैयाँ थियो । अन्य इक्विटीमा ७ करोड ८९ लाख रुपैयाँ रहेको थियो ।
