काठमाडौँ । माछापुच्छ्रे बैंक लिमिटेडले आफ्नो मोबाइल बैंकिङ एप ‘एमबीएल एम–स्मार्ट’ मार्फत नेपाल र भारतबीच रियल–टाइम क्रस–बोर्डर पैसा पठाउने सेवा सुरु गरेको छ। यस सेवाले दुवै देशबीच व्यक्ति–देखि–व्यक्ति (P2P) रकम स्थानान्तरणलाई अझ छिटो, सुरक्षित र सहज बनाउने बैंकले जनाएको छ।
यो नयाँ सुविधाअन्तर्गत भारतमा बसोबास गर्ने, अध्ययन गर्ने वा काम गर्ने नेपाली नागरिकहरूले युपीआईसँग सम्बन्धित डिजिटल भुक्तानी एप प्रयोग गरेर नेपालका बैंक खातामा तुरुन्तै रकम पठाउन सक्नेछन्। पठाइएको रकम लाभग्राहीको खातामा तत्काल जम्मा हुने भएकाले रेमिट्यान्स प्रक्रिया अझ प्रभावकारी हुने अपेक्षा गरिएको छ।
त्यसैगरी, नेपालमा रहेका वा कार्यरत भारतीय नागरिकहरूले पनि एमबीएल एम–स्मार्ट एप प्रयोग गरी भारततर्फ सहजै रकम पठाउन सक्ने व्यवस्था गरिएको छ।
बैंकका अनुसार यो प्रणाली सञ्चालन गर्दा सुरक्षा, पारदर्शिता र नियामकीय मापदण्डलाई उच्च प्राथमिकतामा राखिएको छ। यस पहलले नेपाल–भारत डिजिटल भुक्तानी र रेमिट्यान्स प्रणालीलाई अझ मजबुत बनाउने विश्वास बैंकले व्यक्त गरेको छ।
बैंकले आगामी दिनमा पनि आधुनिक प्रविधिमा आधारित ग्राहकमैत्री बैंकिङ सेवाहरू विस्तार गर्ने प्रतिबद्धता जनाएको छ।
