काठमाडौं । जनमत पार्टीले प्रदेशलाई पूर्ण स्वायत्त बनाउनेलगायत विभिन्न माग अघि सार्दै सोमबार काठमाडौंको माइतीघर क्षेत्रमा प्रदर्शन गरेको छ।
यसअघि भएको आठ बुँदे सहमतिअनुसार प्रदेश सरकारलाई पूर्ण अधिकार दिनुपर्ने, कर्मचारी प्रशासन र स्थानीय तहलाई प्रदेश मातहतमा ल्याउनुपर्ने मागसहित प्रदर्शन गरिएको हो।
पार्टीले प्रमुख जिल्ला अधिकारी, प्रहरी प्रशासनलाई समेत प्रदेश सरकारको नियन्त्रणमा राख्नुपर्ने, नेपाली सेनामा मधेशी तथा थारु समुदायको सामूहिक सहभागिता सुनिश्चित गर्नुपर्ने र जनसंख्याका आधारमा निर्वाचन क्षेत्र निर्धारण गर्नुपर्ने माग पनि अघि सारेको छ।
त्यसैगरी वैदेशिक रोजगारीका समस्या समाधान, किसानलाई समयमै मलखाद र सहुलियतपूर्ण ऋण उपलब्ध गराउने तथा चुरे क्षेत्रको दोहन र अतिक्रमण रोक्नुपर्ने विषय पनि प्रदर्शनका प्रमुख एजेण्डा बनेका थिए।
प्रदर्शनमा सहभागीहरूले मधेशी, थारु, दलित, मुस्लिम, आदिवासी, सुकुम्बासी तथा अन्य अल्पसंख्यक समुदायमाथि भइरहेको विभेद र शोषण अन्त्य गर्नुपर्ने भन्दै नाराबाजी गरेका थिए।
जनमत पार्टीले आफ्ना मागप्रति सरकारको ध्यानाकर्षण गराउँदै संघीय व्यवस्थालाई प्रभावकारी बनाउन आवश्यक सुधार गर्न आग्रह गरेको छ।
