काठमाडौँ । अर्थमन्त्री वर्षमान पुनले आर्थिक वर्ष २०८१- ८२ को बजेटमा स्थानीय तहलाई आर्थिक, राजनीतिक र प्रशासनिक केन्द्रका रूपमा विकास गर्नुपर्ने लक्ष्यसहित बजेट ल्याएको बताएका छन् ।
स्थानीय तहमा औद्योगिक प्रवर्द्धन, पूर्वाधार विकास, शैक्षिक सुधार र स्वास्थ्य संस्थाको स्थापना लगायतका लक्ष्य बजेटमा समावेश गरिएको बताएका छन्। यिनै लक्ष्यसहित केन्द्र सरकारले स्थानीय तहलाई प्राथमिकतामा राखेर बजेट ल्याएको अर्थमन्त्री पुनको दाबी छ ।
यसबाहेक त्यस क्षेत्रका पूर्वाधारलाई आर्थिक विकासको आधारका रूपमा तय गर्ने गरी विकास गर्ने लक्ष्य लिएको उनको भनाई छ ।
साथै पुनले बजेटमार्फत नयाँ चरणको आर्थिक सुधार गर्न चाहेको बताएका छन् ।
बजेट सार्वजनिक पछि पहिलो पटक मन्त्रालयमा पत्रकार सम्मेलनको आयोजना गर्दै अर्थमन्त्री पुनले राज्यको सीमित स्रोत साधनका बाबजुद नयाँ चरणको आर्थिक सुधारको प्रयत्न गरेको बताएका हुन्।
