काठमाडौं । नेपाल स्टक एक्सचेन्ज (नेप्से) ले सूचीकृत कम्पनीहरूलाई आर्थिक वर्ष २०८३/८४ का लागि धितोपत्र वार्षिक नवीकरण शुल्क तोकिएको समयभित्र बुझाउन आग्रह गरेको छ।
नेप्सेले असोज मसान्तसम्म शुल्क नबुझाएमा धितोपत्र सूचीकरण विनियमावली, २०७५ अनुसार वार्षिक १० प्रतिशत जरिवाना लाग्ने र सूचीकरणसमेत स्थगन हुन सक्ने चेतावनी दिएको छ।
नेप्सेका अनुसार ५० करोड रुपैयाँसम्म चुक्ता पूँजी भएका कम्पनीले ५० हजार रुपैयाँ र सोभन्दा माथि पूँजी भएका कम्पनीले १ लाख रुपैयाँ नवीकरण शुल्क तिर्नुपर्नेछ।
यस्तै, डिबेन्चर तथा म्युचुअल फण्डका हकमा ५० करोड रुपैयाँसम्म पूँजी भए २५ हजार रुपैयाँ र सोभन्दा बढी भए ५० हजार रुपैयाँ शुल्क निर्धारण गरिएको छ।
नेप्सेले तोकिएको खातामा रकम जम्मा गरी बैंक भौचर इमेलमार्फत पठाउन सूचीकृत कम्पनीहरूलाई निर्देशन दिएको छ।
