काठमाडौं । नेपालमा हाल निजी र सरकारी क्षेत्रमा गरी दुई वटा पुनर्बीमा कम्पनीहरु संचालनमा छन् । ती कम्पनीहरुको न्यूनतम चुक्तापुँजी १० अर्ब रुपैयाँ तोकिएको छ ।
बीमा क्षेत्रको नियमनकारी निकाय नेपाल बीमा प्राधिकरणले केही महिना अघिसम्म त्यस्तो पुँजी बढाउने र दोब्बर बनाउने बताउदै आएको थियो । पछिल्लो समय नेपालमा रहेको पुनर्बीमा कम्पनीहरुको चुक्ता पुँजी बढाउने विषयमा अध्यक्ष सुर्य सिलवालले आफ्नो धारणा राखेका छन् ।
उनले पुनर्बीमा कम्पनीको चुक्ता पुँजी वृद्धि गर्ने कुरा सेलाएको नभई प्रकृयागत रुपमा नै अघि बढी रहेको जानकारी दिए ।
कुनै पनि कम्पनीमा बीमा भएपश्चात त्यो जोखिमलाई फेरी पुनर्बीमा कम्पनीले धारण गर्छ । पुनर्बीमा कम्पनीको जोखिम धारण प्रकृयालाई रि–इन्स्योरेन्स भनिन्छ । त्यस्तै, फेरी त्यो पुनर्बीमा कम्पनीको पनि जोखिम अन्य बीमा कम्पनीमा पुन पठाइन्छ भने त्यसलाई रेट्रोसेसन भनिन्छ ।
केही महिना अघि अरु कम्पनीहरु मर्जरमा गएको बेलामा बीमा प्राधिकरणले पनि जोडतोडका साथ पुनर्बीमाको मर्जरको विषय उठाएको थियो । तर,अहिले भने त्यसमा प्राधिकरणले त्यति धेरै ताकिता गरेको पाइदैन । बीमाको काम नै अरुको रक्षावरण गर्ने भएकाले त्यसमा बीमा कम्पनीहरु आफै बलियो हुनुको विकल्प नरहेको बीमा प्राधिकरणका अध्यक्ष सिलवाल बताउँछन् ।
स्वदेशमै व्यवसाय राख्न जोड
हालसम्म नेपालमा संलचालनमा रहेका पुनर्बीमा कम्पनीहरुको चुक्ता पुँजी १० अर्ब रुपैयाँ छेउछाउ रहेको बेलामा बीमा प्राधिकरणले त्यसलाई २० अर्ब बनाउनु पर्ने बताएको हो ।
