काठमाडौँ। आज महाशिवरात्रि पर्व देशभर श्रद्धा र भक्ति भावका साथ मनाइँदै छ। विशेषगरी पशुपतिनाथ मन्दिर परिसरमा दर्शनार्थीहरूको उल्लेख्य भीड लाग्ने अपेक्षा गरिएको छ। पशुपति क्षेत्र विकास कोषका अनुसार आज करिब ७ लाख भक्तजनले दर्शन गर्ने आकलन गरिएको छ।
दर्शनलाई सहज र व्यवस्थित बनाउन मन्दिरका चार वटै मुख्य ढोका बिहानैदेखि खुला गरिएको कोषले जनाएको छ।
सुरक्षा व्यवस्था कडा
ठूलो संख्यामा श्रद्धालु सहभागी हुने भएकाले स्थानीय प्रशासनले विशेष सुरक्षा योजना लागू गरेको छ। जिल्ला सुरक्षा समितिको निर्णयअनुसार सुरक्षा रणनीति कार्यान्वयनमा ल्याइएको जिल्ला प्रहरी परिसर काठमाडौँले जनाएको छ।
मन्दिर परिसरमा अस्थायी कमान्ड पोस्ट स्थापना गरिएको छ। बालबालिका हराउने, चोरी–डकैती तथा अन्य अवाञ्छित गतिविधि नियन्त्रणका लागि सो कमान्ड पोस्टमा प्रहरी निरीक्षण र निगरानी बढाइएको छ। परिसर काठमाडौँका एसपी पवन भट्टराई नेतृत्वमा सुरक्षा समन्वय हुने जनाइएको छ।
पशुपति क्षेत्रको सुरक्षाका लागि करिब ३ हजार ७ सय नेपाल प्रहरी परिचालन गरिएको छ। यसका अतिरिक्त निर्वाचन प्रहरीलाई समेत सुरक्षामा खटाइएको छ। नेपाल प्रहरी, सशस्त्र प्रहरी बल, राष्ट्रिय अनुसन्धान विभाग तथा महानगर प्रहरी गरी करिब ६ हजार सुरक्षाकर्मी परिचालन गरिएको प्रशासनले जनाएको छ।
उच्चस्तरीय अनुगमन
महाशिवरात्रि पूर्वसन्ध्यामा गृहमन्त्री ओमप्रकाश अर्याल, गृहसचिव राजकुमार श्रेष्ठ तथा काठमाडौँका प्रमुख जिल्ला अधिकारी ईश्वर राज पौडेललगायतका अधिकारीहरूले पशुपति क्षेत्रमा पुगेर सुरक्षा तयारी र व्यवस्थापन अवस्थाबारे जानकारी लिएका थिए। उनीहरूले भीड व्यवस्थापन, आपत्कालीन उद्धार तयारी तथा समन्वय प्रणाली प्रभावकारी बनाउन निर्देशन दिएको बताइएको छ।
भक्तजनलाई आग्रह
प्रशासनले दर्शनार्थीलाई धैर्यतापूर्वक लाइनमा बस्न, सुरक्षाकर्मीको निर्देशन पालना गर्न तथा आफ्ना बालबालिका र सरसामानप्रति सचेत रहन आग्रह गरेको छ। सम्भावित भीडलाई मध्यनजर गर्दै अत्यावश्यक बाहेक सवारी साधन प्रयोग नगर्न तथा सार्वजनिक यातायातको उपयोग गर्न समेत अनुरोध गरिएको छ। महाशिवरात्रिका अवसरमा पशुपतिनाथ क्षेत्रमा धार्मिक आस्था, सांस्कृतिक उल्लास र कडा सुरक्षा व्यवस्थाबीच श्रद्धालुहरूको उल्लेख्य सहभागिता रहने अपेक्षा गरिएको छ।
