काठमाडौँ । मीनभवनस्थित यातायात व्यवस्था विभागमा आगलागी हुँदा इम्बोस्ड नम्बर प्लेट उत्पादन गर्ने प्लान्ट र सवारी चालक अनुमतिपत्र (लाइसेन्स) छपाइ गर्ने मेशिन जलेर नष्ट भएका छन्। भवन जीर्ण बनेपछि तत्काल सञ्चालन गर्न नसकिने विभागले जनाएको छ।
आगलागीमा करिब ६ लाखभन्दा बढी इम्बोस्ड नम्बर प्लेट र ७ वटा सवारीसाधन जलेका छन्। साथै करिब २० हजार छपाइ भएका लाइसेन्स पनि क्षतिग्रस्त वा हराएका छन्।
विभागमा रहेको सबै कम्प्युटर र रेकर्ड नष्ट भएको छ।
यस कारण लाइसेन्स छपाइ, वितरण र नम्बर प्लेट जडानसम्बन्धी सबै सेवा अनिश्चितकालका लागि बन्द भएका छन्। विभागले सेवाप्रवाह पुनः सुरु गर्न कम्तीमा एक–दुई महिना लाग्ने अनुमान गरेको छ।
