काठमाडौँ । शिखर इन्स्योरेन्स कम्पनी लिमिटेडले चालू आर्थिक वर्षको दोस्रो त्रैमाससम्मको वित्तीय विवरण सार्वजनिक गरेको छ। सार्वजनिक विवरण अनुसार, कम्पनीको व्यवसाय वृद्धिले सकारात्मक संकेत दिएको छ, यद्यपि केही खर्च वृद्धिका कारण नाफामा अस्थायी गिरावट देखिएको छ।
समीक्षा अवधिमा कम्पनीले ७८ करोड ५ लाख रुपैयाँ खुद बीमाशुल्क आर्जन गरेको छ। यो गत आवको पुस मसान्तको ६३ करोड ७६ लाख रुपैयाँको तुलनामा २२.४१ प्रतिशतले वृद्धि हो।
कम्पनीको कुल खर्च भने समीक्षा अवधिमा ७९ करोड ७८ लाख रुपैयाँबाट बढेर १ अर्ब २९ करोड ९३ लाख रुपैयाँ पुगेको छ। यसमा अभिकर्तालाई दिइएको कमिशन पनि २ करोड ६८ लाख रुपैयाँबाट १९.८२ प्रतिशत बढेर ३ करोड २२ लाख रुपैयाँ पुगेको छ।
कम्पनीको वित्तीय स्थिति बलियो रहेको देखिन्छ । चुक्तापुँजी २ अर्ब ९३ करोड, स्पेशल रिजर्भ १ अर्ब ९१ करोड ७६ लाख, महाविपत्ति कोष १६ करोड ११ लाख र जगेडा कोष १६ करोड ५७ लाख रहेको छ। पुस मसान्तसम्म कम्पनीले ४ अर्ब ६६ करोड ९२ लाख रुपैयाँ लगानी गरेको छ।
त्यस्तै, कम्पनीको प्रतिशेयर आम्दानी (EPS): ऋणात्मक ३.०६ रुपैयाँ रहेको छ भने प्रतिशेयर नेटवर्थ: १९६.६४ रुपैयाँ र सोल्भेन्सी अनुपात: ४.७४ प्रतिशत कायम रहेको छ। कम्पनीले आफ्नो वित्तीय आधारलाई बलियो राख्दै, लगानी र बजार विस्तारमा सक्रियता बढाएकोले आगामी त्रैमासमा नाफामा पनि सुधार आउने अपेक्षा गरिएको छ।
