काठमाडौं । सरकारले कृषि तथा पशुपन्छी बीमाको प्रिमियममा दिने भनेको अनुदान बापत बल्ल ७५ करोड रुपैयाँ निकासा गरेको छ । सरकारले आज बसेको छलफल पश्चात् पहिलो चरणको कृषि बीमा दाबी भुक्तानी रकम दिने भएको हो ।
सरकारले कृषि तथा पशुपन्छी बीमाका लागि ८० प्रतिशत अनुदान दिदै आएको छ । निर्जीवन बीमा कम्पनीहरुले गत जेठ ७ गतेबाट यसको कारोबार स्थगित गरिरहेको छ ।
संघका अनुसार सरकारले अनुदान बापत २ अर्ब ९४ करोड ५८ रुपैयाँ दिनुपर्नेछ । पहिलो चरणको रकम दिने सहमती भएको छ, कृषि मन्त्रालयले चार महिनाको रकम दिन लागेको हो । मन्त्रालयले मंसिर, पुस, माघ, फागुण महिनाको अनुदान वापतको रकम भुक्तानी गर्न लागेको हो ।
बीमा कम्पनीहरुले सरकारले अनुदान बापत दिनु पर्ने रकमलाई बाँकी राखेर कृषकहरु सँग २० प्रतिशत मात्रै बीमा शुल्क लिएर बीमा गराउदै आएका थिए । यसरी सरकारले नै बीमाको सिद्धान्त विपरित उधारोमा बीमा गराउदै आएको थियो ।
