काठमाडौँ। पोखरा स्थित सूर्यदर्शन सहकारीको रकम अपचलन मुद्दामा राष्ट्रिय स्वतन्त्र पार्टी (रास्वपा) का सभापति रवि लामिछानेको बयान सकिएको छ।
मंगलबार जिल्ला अदालत कास्कीमा रविसहित ७ जनाको बयान सकिएको अदालतले जानकारी दिएको छ । रविसँगै पूर्वडीआईजी छविलाल जोशी, लिला पछाईं, रामबहादुर खनाल, पूर्व सांसद मीना गुरुङ, कृष्णबहादुर गुरुङ र आरती गुरुङको समेत बयान लिइएको छ ।
बयान सकिएसँगै मंगलबार नै थुनछेक बहस हुने अदालतको जानकारी छ ।
यो मुद्दा न्यायाधीश नितिज राईको इजलासमा परेको छ। सहकारी ठगी आरोपमा पक्राउ परेकाहरूलाई सम्पत्ति शुद्धीकरण र सङ्गठित अपराध मुद्दा पनि थपिएको छ ।
सूर्यदर्शन सहकारी ठगी प्रकरणमा लामिछाने गत कात्तिक २ गतेयता कास्की प्रहरीको हिरासतमा छन्। उनीमाथि प्रहरीले सहकारी ठगी, सम्पत्ति शुद्धीकरण र संगठित अपराधमा आठ पटक म्याद थपेर अनुसन्धान गरेको थियो।
