काठमाडौं। सानिमा रिलाइन्स लाइफ इन्स्योरेन्स लिमिटेडले आर्थिक वर्ष २०८२/८३ को दोस्रो त्रैमास (साउन–पुस)सम्मको अपरिष्कृत वित्तीय विवरण सार्वजनिक गरेको छ। सार्वजनिक विवरणअनुसार सानिमा रिलाइन्सले नाफा, बीमाशुल्क संकलन तथा जीवन बीमा कोषमा उल्लेखनीय वृद्धि हासिल गरेको छ।
वित्तीय विवरणअनुसार चालु आर्थिक वर्षको पहिलो ६ महिनामा सानिमा रिलाइन्सले २७ करोड ६१ लाख रुपैयाँ खुद नाफा आर्जन गरेको छ। अघिल्लो आर्थिक वर्ष २०८१/८२ को सोही अवधिसम्म सानिमा रिलाइन्सले २३ करोड १६ लाख रुपैयाँ नाफा कमाएको थियो।
इक्विटी संरचनातर्फ समीक्षा गर्दा महाविपत्ति कोषमा १७ करोड ५३ लाख रुपैयाँ सञ्चित रहेको छ। रिटेन्ड अर्निङ २६ करोड ५७ लाख रुपैयाँ कायम भएको छ भने अन्य इक्विटी २ करोड ७० लाख रुपैयाँले ऋणात्मक देखिएको छ। अघिल्लो वर्ष असार मसान्तसम्म महाविपत्ति कोष १४ करोड ७८ लाख रुपैयाँ, रिटेन्ड अर्निङ ५३ करोड २७ लाख रुपैयाँ तथा अन्य इक्विटी ७ करोड ८२ लाख रुपैयाँ रहेको थियो।
जीवन बीमा कोषतर्फ सानिमा रिलाइन्सले उल्लेखनीय विस्तार गरेको छ। चालु आर्थिक वर्षको पुस मसान्तसम्म जीवन बीमा कोषको आकार २१ अर्ब ९० करोड ३४ लाख रुपैयाँ पुगेको छ। अघिल्लो वर्षको सोही अवधिमा यस्तो कोष १६ अर्ब ६० करोड ३३ लाख रुपैयाँ थियो। यस आधारमा जीवन बीमा कोष ३१.९२ प्रतिशतले वृद्धि भएको छ, जसले सानिमा रिलाइन्सको दीर्घकालीन दायित्व वहन क्षमता मजबुत बन्दै गएको देखाउँछ।
बीमाशुल्क संकलनतर्फ पनि सानिमा रिलाइन्सले वृद्धि कायम राखेको छ। समीक्षा अवधिसम्म सानिमा रिलाइन्सले ३ अर्ब ६८ करोड ८१ लाख रुपैयाँ कुल बीमाशुल्क आर्जन गरेको छ, जुन अघिल्लो वर्षको सोही अवधिको ३ अर्ब २० करोड ३० लाख रुपैयाँको तुलनामा १५.१४ प्रतिशतले बढी हो। त्यसैगरी, खुद बीमाशुल्क ३ अर्ब ५५ करोड ६२ लाख रुपैयाँ पुगेको छ। अघिल्लो वर्षको सोही अवधिमा यस्तो रकम ३ अर्ब ११ करोड १४ लाख रुपैयाँ थियो। यसरी खुद बीमाशुल्क १४.३० प्रतिशतले वृद्धि भएको देखिन्छ।
५ अर्ब १ करोड ४९ लाख रुपैयाँ चुक्ता पूँजी रहेको सानिमा रिलाइन्सको वार्षिकीकृत प्रतिशेयर आम्दानी (ईपीएस) बढेर ११.०१ रुपैयाँ कायम भएको छ। अघिल्लो वर्ष ईपीएस ९.३६ रुपैयाँ थियो। सानिमा रिलाइन्सको पीई रेसियो ३६.३१ गुणा रहेको छ भने प्रतिशेयर नेटवर्थ १०८.२६ रुपैयाँ कायम भएको छ। समग्रमा, चालु आर्थिक वर्षको दोस्रो त्रैमाससम्म सानिमा रिलाइन्स लाइफ इन्स्योरेन्सले नाफा, बीमाशुल्क संकलन तथा जीवन बीमा कोषमा सन्तुलित वृद्धि देखाएको छ।
