काठमाडौँ। सिटिजन लाइफ इन्स्योरेन्स कम्पनी लिमिटेडको नाफामा बढोत्तरी भएको छ । कम्पनीको बीमाशुल्क आर्जन बढेसँगै नाफामा सुधार आएको हो ।
कम्पनीले सार्वजनिक गरेको चालु आर्थिक वर्ष २०८१/८२ को दोस्रो त्रैमाससम्मको वित्तीय विवरण अनुसार २३ करोड ९ लाख रुपैयाँ खुद नाफा आर्जन गरेको छ। यो नाफा अघिल्लो आवको सोही अवधिको तुलनामा ८६.७८ प्रतिशतले बढी हो।
अघिल्लो आवको दोस्रो त्रैमाससम्ममा कम्पनीले १२ करोड ३६ लाख रुपैयाँ खुद नाफा आर्जन गरेको थियो। कम्पनीको खुद बीमाशुल्क आर्जन पनि २३.६९ प्रतिशतले बढेको छ। दोस्रो त्रैमाससम्म कम्पनीले ३ अर्ब १८ करोड रुपैयाँ बराबरको खुद बीमाशुल्क आर्जन गरेको छ।
अघिल्लो आवको दोस्रो त्रैमाससम्म कम्पनीले २ अर्ब ५७ करोड रुपैयाँ बराबरको खुद बीमाशुल्क आर्जन गरेको थियो। कम्पनीको कुल आम्दानी भने ४ अर्ब १८ करोड रुपैयाँ रहेको छ। त्यस्तै समीक्षा अवधिमा कम्पनीले ३ अर्ब २१ करोड रुपैयाँ खुद दाबी भुक्तानी गरेको छ। अघिल्लो वर्षको सोही अवधिमा यो रकम २ अर्ब ६० करोड रुपैयाँ थियो।
यस्तै, समीक्षा अवधिसम्म कम्पनीले लगानी कर्जा तथा अन्यबाट हुने आय बापत ९५ करोड ६ लाख रुपैयाँ, अन्य प्रत्यक्ष आम्दानीबाट ९० लाख र बीमितलाई प्रदान गरिएको कर्जाबाट ४ करोड ७२ लाख रुपैयाँ बराबरको आम्दानी गरेको छ।
कम्पनीले समीक्षा अवधिसम्म ३ अर्ब ९५ करोड रुपैयाँ बराबरको कुल खर्च गरेको छ। अघिल्लो वर्ष कम्पनीको खर्च ३ अर्ब २३ करोड रुपैयाँ थियो। कम्पनीको रिटेन्ड अर्निङमा ८३ करोड ८० लाख सञ्चित छ ।
त्यस्तै, कम्पनीको प्रतिसेयर आम्दानी (ईपीएस) ११.७३ रुपैयाँ, प्रतिसेयर नेटवर्थ १८१.८२ रुपैयाँ,अनुपात ५९.२४ गुणा कायम भएको छ।
