काठमाडौं। मार्जिन कारोबारका लागि नेपाल स्टक एक्सचेन्ज (नेप्से) ले योग्य सूचीकृत कम्पनीको सूची सार्वजनिक गरेको छ।
नेप्सेले आज सार्वजनिक गरेको सूचीअनुसार १०२ वटा सूचीकृत कम्पनी मार्जिन कारोबारका लागि योग्य देखिएका हुन्। जस अनुसार ९ वटा जीवन बीमा कम्पनी, ९ वटा निर्जीवन बीमा कम्पनी र एउटा पुनर्बीमा कम्पनी गरेर जम्मा १९ वटा बीमा कम्पनी सूचीमा परेका छन्।
साथै, यो सूचीमा महालक्ष्मी सहित राष्ट्रियस्तरका ६ वटा विकास बैंक, ३३ वटा लघुवित्त संस्था र एउटा फाइनान्स कम्पनी परेको छ ।
लगानी समूहका ४ वटा, उत्पादन समूहका ३ वटा, जलविद्युत समूहका १५ वटा, होटल समूहका २ वटा र अन्य समूहबाट नेपाल टेलिकम मार्जिन कारोबारयोग्य कम्पनीमा परेका छन्।
नेप्सेले यस अघि सार्वजनिक गरेको यो सूचीमा ११२ वटा कम्पनी रहेका थिए । मार्जिन कारोबार सुविधासम्बन्धी कार्यविधि, २०७५ को परिच्छेद ३ को दफा ८ बमोजिम मापदण्ड पूरा गरेका कम्पनीहरुलाई मार्जिन कारोबार योग्य कम्पनीको सूचीमा राखिएको नेप्सेले जनाएको छ ।
