काठमाडौँ । नेपाल राष्ट्र बैंकले क्रेडिट कार्डको प्रयोग गर्दा सर्त, शुल्क र समयसीमाबारे पूर्ण जानकारी लिएर मात्र प्रयोग गर्न सर्वसाधारणलाई आग्रह गरेको छ ।
बैंकका अनुसार क्रेडिट कार्ड जिम्मेवारीपूर्वक प्रयोग गर्न सकेमा यो सुरक्षित र सुविधाजनक भुक्तानीको माध्यम हो, तर लापरबाही गर्दा आर्थिक बोझ र उच्च ब्याजको जोखिम पनि रहन्छ ।
राष्ट्र बैंकले जारी गरेको विज्ञप्तिमा भनिएको छ, “क्रेडिट कार्डको बिल तोकिएको समयभित्र तिर्दा कुनै ब्याज वा अतिरिक्त शुल्क लाग्दैन । तर, समयमै भुक्तानी नगरेमा उच्च दरको ब्याज र हर्जाना लाग्न सक्छ।”
राष्ट्र बैंकका अनुसार क्रेडिट कार्ड ‘क’ श्रेणीका वाणिज्य बैंक र राष्ट्रियस्तरका ‘ख’ तथा ‘ग’ वर्गका बैंक तथा वित्तीय संस्थाबाट मात्र जारी गर्न पाइन्छ । यसको प्रयोगबाट वस्तु तथा सेवाको मूल्य तिर्नका साथै तोकिएको सीमासम्म नगद समेत निकाल्न सकिने सुविधा हुन्छ ।
वित्तीय चेतनाका लागि राष्ट्र बैंकले जारी गरेको सन्देशमा भनिएको छ, “सर्त बुझेर जिम्मेवारीपूर्वक प्रयोग गरौँ, क्रेडिट कार्ड सजग ग्राहकको पहिचान हो।”
