काठमाण्डौः जिल्ला प्रशासन कार्यालय काठमाण्डौले महाशिवरात्रि पर्वको लागि पशुपति मन्दिर परिसर आसपासका क्षेत्रमा पाँच दिन मासु,जाँडरक्सी र अरू नशालु पदार्थ बेचबिखनमा रोक लगाएको छ ।
प्रमुख जिल्ला अधिकारी जितेन्द्र बस्नेतले आज एक सूचना निकालेर भोलि फागुन २३ गतेदेखि फागुन २७ गतेसम्म पशुपति क्षेत्र आसपास कसैले पनि मासु, जाँडरक्सी तथा नशालु पदार्थहरू उत्पादन, बेचबिखन, ओसारपसार, भण्डार र सेवन नगर्न आग्रह गरिएको छ ।
प्रशासनले स्थानीय प्रशासन ऐन, २०२८ को दफा ६ को उपदफा ३ बमोजिम यस्ता गतिविधि पूर्ण रूपमा रोक लगाएको हो।
फागुन २५ गते महाशिवरात्रि पर्व मनाइँदै छ । पशुपति क्षेत्र विकास कोषले महाशिवरात्रि २०८० को तयारी अन्तिम चरणमा पुगेको जनाएको छ । कोषका अनुसार शिवरात्रिमा ६ हजार स्वयंसेवक परिचालन हुने तयारी गरिएको छ । यता पशुपति क्षेत्र विकास कोषले महाशिवरात्रिको तयारी अन्तिम अवस्थामा पुगेको बताएको छ ।
