काठमाडौँ । काठमाडौँको तीन कुनेमा गत चैत १५ गते भएको राजावादीहरूको प्रदर्शनका क्रममा भएको हुलदङ्गाका कारण भएको क्षतिमा हालसम्म निर्जीवन बीमा कम्पनीहरूले ५ करोड रुपैयाँ बराबरको दाबी परेको छ।
राजावादीको हुलदङ्गामा भएको क्षतिमा ४ करोड ५९ लाखको बिमा दाबी परेको हो। जस अनुसार हालसम्म २२ वटा निजी गाडी, २१ वटा घर तथा व्यवसाय (सम्पत्ति), ३ वटा इन्जिनियरिङ तथा ठेकेदार जोखिम, २ वटा सार्वजनिक गाडी र अन्य २ वटा गरी कुल ५० वटा दाबी परेको प्राधिकरणले उल्लेख गरेको छ ।
यसअनुसार सबैभन्दा बढी दाबी सम्पत्ति बिमामा परेको छ । २१ वटा आवेदनमा २ करोड ७८ लाख रुपैयाँ बराबरको दाबी परेको हो । मोटर बिमामा १ करोड ६ लाख, इन्जिनियरिङ तथा ठेकेदार जोखिमका ३ दाबीमा ३७ लाख, मोटर बिमा (सार्वजनिक) मा २७ लाख ५० हजार र विविधमा १० लाख रुपैयाँ बराबरको दाबी परेको प्राधिकरणले जनाएको छ ।
परेका दाबीमध्ये वैशाख ३ गतेसम्म ३३ लाख ३५ हजार हजार रुपैयाँ भुक्तानी भइसकेको पनि प्राधिकरणले जनाएको छ । यस अवधिमा सिद्धार्थ प्रिमियरले ५ वटा, सगरमाथा लुम्बिनीले २ वटा , आइजीआई प्रुडेन्सियलले १ वटा र शिखर इन्सुरेन्सले ५ वटा गरेर १३ वटा दाबी भुक्तानी गरिसकेका छन् ।
