काठमाडौँ । नेपालले अति कम विकसित मुलुकबाट विकासशील राष्ट्रमा स्तरोन्नति हुने प्रक्रिया तत्कालका लागि रोकेको छ। सरकारले विश्वव्यापी आर्थिक अनिश्चितता र बढ्दो द्वन्द्वका कारण उक्त निर्णय लिएको जनाएको छ।
परराष्ट्र मन्त्रालयले नियमित पत्रकार सम्मेलनमार्फत जानकारी दिँदै प्रवक्ता लोकबहादुर क्षेत्रीले हालको अवस्थालाई ध्यानमा राख्दै स्तरोन्नति कार्यक्रम केही समयका लागि अगाडि नबढाउने स्पष्ट पारे।
नेपालले यसअघि सन् २०२४ भित्र विकासशील राष्ट्रको सूचीमा प्रवेश गर्ने लक्ष्य राखेको थियो।
सरकारका अनुसार विश्वव्यापी द्वन्द्वका कारण आपूर्ति शृङ्खला प्रभावित भएको, वैदेशिक रोजगारी घटेको तथा रेमिट्यान्स प्रवाहमा असर परेको छ। साथै, विश्व बैंक ले नेपालको आर्थिक वृद्धिदर सीमित रहने प्रक्षेपण गर्नु पनि निर्णयको अर्को कारण बनेको छ।
विकासशील राष्ट्रमा स्तरोन्नति भएपछि नेपालले हाल पाउँदै आएको भन्सार छुट तथा कोटा सुविधा गुम्ने सम्भावना रहेकोले अहिलेको अवस्थामा यसले अर्थतन्त्रमा थप दबाब सिर्जना गर्न सक्ने सरकारको आकलन छ। कोभिड–१९ को दीर्घकालीन प्रभाव र भूराजनीतिक जटिलताले समेत आर्थिक पुनरुत्थानमा चुनौती थपेको मन्त्रालयले जनाएको छ।
