काठमाडौं । नेपालले अनुदानमा पाएको मुर्रा राँगा लिन चार जनाको टोली भारत जाने भएको छ । मुर्रा राँगा लिन असार अन्तिमतिर चार जनाको टोली भारत जान लागेको हाे ।
मुर्रा राँगा लिन जाने टोलीमा टोलीमा पशु सेवा विभागका महानिर्देशकसहित राष्ट्रिय पशु प्रजनन केन्द्र पोखरा, पशु प्रजनन केन्द्र लहान, र क्वारेन्टाइन शाखाका प्रमुख रहेका छन् ।
भारतले अनुदानमा दिने १५ वटा राँगालाई एकै लटमा नेपाल ल्याइने पशु सेवा विभागका सूचना अधिकारी चन्द्र ढकालले बताए ।
प्रधानमन्त्री पुष्पकमल दाहालको हालै भएको भ्रमणका क्रममा भारतले नेपाललाई १५ वटा उन्नत नश्लका मुर्रा राँगा दिने जनाएको हो ।
मुर्रा राँगाबाट नश्ल सुधार भएका भैंसीले रैथाने भैंसीको तुलनामा झन्डै तीन गुणा बढी दूध दिने ढकालले बताए ।
सरकारले भारतबाट उन्नत नस्लका मुर्रा राँगा ल्याउन २०७३ सालबाटै पहल सुरू गरेको थियो । यी राँगाबाट रैथाने भैंसीको नश्ल सुधार हुने हुँदा सरकारले सात वर्षदेखि मुर्रा राँगा ल्याउन भारतसँग पहल गरिरहेको थियो ।
