काठमाडौँ – सञ्चार तथा सूचना प्रविधि मन्त्री जगदीश खरेलले सवारी चालक अनुमति पत्र (लाइसेन्स) छपाइको उद्घाटन गरेका छन्। शुक्रबार काभ्रेमा आयोजित विशेष समारोहमा उनले सुरक्षण मुद्रण केन्द्रमार्फत छापिने नयाँ लाइसेन्सको औपचारिक उद्घाटन गरेका हुन्।
यसअघि यातायात व्यवस्था विभागका महानिर्देशक राजीव पोखरेल र सुरक्षण मुद्रण केन्द्रका कार्यकारी निर्देशक देवराज ढुङ्गानाबीच लाइसेन्स छपाइसम्बन्धी समझदारी पत्रमा हस्ताक्षर भइसकेको थियो। पुरानो २५ लाख लाइसेन्समध्ये १२ लाख लाइसेन्स अब सुरक्षण मुद्रण केन्द्रमार्फत छापिने भएको छ।
यसअघि, गत भदौ २३–२४ को जेनजी आन्दोलनका क्रममा यातायात व्यवस्था विभाग पूर्णरूपमा तोडफोड र आगजनीबाट क्षतिग्रस्त भएको थियो।
सोही क्रममा सवारी लाइसेन्स छपाइ मेशिन पनि पूर्ण रूपमा नष्ट भएको थियो। मन्त्री खरेलले यस उद्घाटन समारोहमा नयाँ छपाइ प्रणालीले लाइसेन्स वितरणमा गुणस्तर र सुरक्षा सुनिश्चित गर्ने बताए।
