काठमाडौं । प्राइम कमर्सियल बैंकले गत आर्थिक वर्ष २०८२/८३ मा ४ अर्ब ११ करोड रुपैयाँ खुद नाफा आर्जन गरेको छ । बैंकको नाफा अघिल्लो आर्थिक वर्षको तुलनामा करिब २८ प्रतिशतले बढेको हो । आर्थिक वर्ष २०८१/८२ मा बैंकले ३ अर्ब २० करोड रुपैयाँ खुद नाफा कमाएको थियो ।
बैंकको ब्याज आम्दानीमा भएको सुधारले नाफा वृद्धिमा योगदान गरेको देखिन्छ ।
समीक्षा अवधिमा बैंकको खुद शुल्क तथा कमिसन आम्दानी १ अर्ब ९४ करोड ९३ लाख रुपैयाँ पुगेको छ । त्यस्तै, कुल सञ्चालन आम्दानी ११ अर्ब ९० करोड ८ लाख रुपैयाँ र सञ्चालन नाफा ६ अर्ब ८३ करोड ३० लाख रुपैयाँ रहेको छ ।
बैंकको वितरणयोग्य नाफा १ अर्ब ९० करोड ७४ लाख रुपैयाँ रहेको छ । हाल बैंकको चुक्ता पुँजी २० अर्ब ९५ करोड ४७ लाख रुपैयाँ छ भने जगेडा कोषमा १३ अर्ब ९७ करोड ६१ लाख रुपैयाँ सञ्चित रहेको छ ।
नाफामा भएको वृद्धिसँगै बैंकको प्रतिशेयर आम्दानी पनि बढेको छ । अघिल्लो आर्थिक वर्षमा १६ रुपैयाँ ५० पैसा रहेको प्रतिशेयर आम्दानी गत वर्ष बढेर १९ रुपैयाँ ६३ पैसा पुगेको छ ।
तर, बैंकको खराब कर्जा भने बढेको छ । अघिल्लो आर्थिक वर्षमा ५.८१ प्रतिशत रहेको खराब कर्जा गत आर्थिक वर्षमा बढेर ६.६९ प्रतिशत पुगेको वित्तीय विवरणले देखाएको छ ।
