काठमाडौं । प्राइम कमर्सियल बैंक लिमिटेडले जारी गरेको ऋणपत्रमा आवेदन दिने आज अन्तिम दिन रहेको छ। बैंकले असार १६ गतेदेखि निष्कासन गरेको ३ अर्ब रुपैयाँबराबरको ‘प्राइम बैंक डिबेञ्चर २०९३’ मा लगानीकर्ताको आकर्षण उच्च देखिएपछि निर्धारित समयअगावै आवेदन बन्द गर्न लागिएको हो।
सुरुमा असार ३० गतेसम्म आवेदन खुला रहने व्यवस्था गरिएको भए पनि मागभन्दा बढी आवेदन परेपछि छिट्टै निष्कासन बन्द गरिने तयारी गरिएको बैंकले जनाएको छ।
उक्त ऋणपत्र प्रतिकित्ता १ हजार रुपैयाँ दरका कुल ३० लाख कित्ता निष्कासन गरिएको हो।
१० वर्ष अवधिको यो ऋणपत्रमा वार्षिक ६.२५ प्रतिशत ब्याजदर तोकिएको छ। इच्छुक लगानीकर्ताले सि–आस्बा प्रणालीमार्फत सहभागी बैंक तथा वित्तीय संस्थाहरू र तिनका शाखाबाट आवेदन दिन सक्नेछन्। न्यूनतम २५ कित्ता र अधिकतम २ लाख कित्तासम्म आवेदन दिन मिल्ने व्यवस्था गरिएको छ।
यस ऋणपत्रको निष्कासन तथा बिक्री प्रबन्धकको रूपमा सानिमा क्यापिटल लिमिटेड रहेको छ। बैंकले यसअघि नेपाल धितोपत्र बोर्डबाट आवश्यक स्वीकृति प्राप्त गरिसकेको थियो।
