काठमाडौं। हाल दैनिकजसो बैंक, वित्तीय संस्था तथा लघुवित्त कम्पनीहरुका सेयरधनीहरुले संस्थापक सेयर बिक्रीमा राखेर सूचना जारी गरेको देखिन्छ । सेयरधनीहरुले हजारदेखि लाखौं कित्तासम्म सेयर बिक्री खुला गरिरहेका हुन्छन् ।
तर तोकिएको समयमा उक्त सेयर सबै बिक्री भएको हुँदैन । नेपाल राष्ट्र बैंकको नियम अनुसार संस्थापक सेयरधनीले पहिला विद्यमान संस्थापकलाई सेयर बिक्री खुला गर्नुपर्ने हुन्छ ।
तर अहिलेको अवस्थामा अन्य व्यक्तिले पनि उक्त सेयर खरिद गरेका छैनन् । केही सीमित कित्तामात्र सेयर खरिदबिक्री हुने गरेको देखिएको छ । एक बैंकरले लगानीकर्तालाई पैसा चाहिएर नै यसरी सस्तो मूल्यमा सेयर बिक्री गर्नुपर्ने अवस्था आएको बताउँछन् । उनले भने, ‘यसरी सस्तो मूल्यमा सेयर बिक्री गर्नुपरेको छ । पैसा चाहेर नै भन्नु पर्छ ।’ त्यसो त, संस्थापक सेयरको भाउ त्यही १०० रुपैयाँ आसपास नै रहेको हुन्छ । तरपनि सबै बिक्री हुँदैन ।
संस्थापक सेयर बिक्री गर्न संस्थापकलाई हम्मे हम्मे हुन्छ । लगानीकर्ताहरुले कि त आफैले मान्छे खोजेर सेयर बिक्री गर्नु पर्छ । अन्यथा, पत्र पत्रिकामा सूचना जारी गरेर सेयर बिक्री गर्नु पर्ने अवस्था छ ।
तर यसरी पनि उक्त सेयर सहजै बिक्री हुँदैन । यसको कारण भनेको दोस्रो बजारमा सहज कारोबार नहुनु नै हो । संस्थापक सेयर सहजै बिक्री गर्न नमिल्ने र प्रतिफलको रुपमा बोनस सेयर मात्र प्राप्त गर्दा संस्थापक झनै मारमा परेका हुन् ।
