काठमाडौँ । विश्वबजारमा कच्चा तेलको मूल्य चार महिनायताकै न्यून स्तरमा पुगेको छ। बिहीबार विश्वव्यापी मानक ब्रेन्ट क्रूडको मूल्य केही समयका लागि प्रतिब्यारेल ७२.४८ अमेरिकी डलरसम्म झरेको थियो, जुन फेब्रुअरी २८ यताकै सबैभन्दा कम मूल्य हो।
उक्त मूल्य अमेरिका र इजरायलले इरानमाथि आक्रमण गर्नुअघि रहेको स्तरसँग मिल्दोजुल्दो रहेको बताइएको छ।
अमेरिका र इरानबीच १७ जुनमा भएको सहमतिपछि विश्व ऊर्जा बजारमा दबाब कम भएको मानिएको छ। कच्चा तेल तथा ग्यासको अन्तर्राष्ट्रिय ढुवानीका लागि अत्यन्त महत्वपूर्ण मानिने स्ट्रेट अफ होर्मुजमा ढुवानी गतिविधि पुनः नियमित हुन थालेपछि तेलको मूल्य घट्न सहयोग पुगेको विश्लेषण गरिएको छ।
यसअघि इरानी आक्रमणपछि उक्त समुद्री मार्ग लगभग अवरुद्धजस्तै बनेको थियो, जसका कारण विश्व ऊर्जा बजारमा अनिश्चितता बढ्दै इन्धनको मूल्यमा तीव्र उतारचढाव देखिएको थियो।
यसैबीच, आणविक कार्यक्रम तथा क्षेत्रीय तनाव अन्त्यसँग सम्बन्धित विषयमा इरान र अमेरिकाबीच आगामी ६० दिनसम्म वार्ता जारी रहने जनाइएको छ।
