काठमाडौं । नेपाल राष्ट्र बैंकका कायम मुकायम गभर्नर बमबहादुर मिश्रले अर्थतन्त्रमा अझै केही समस्या रहेको बताएका छन् । उनले अर्थतन्त्रमा समस्या हुँदा अहिले आयात व्यापारसमेत घटेको बताए ।
नेपाल उद्योग वाणिज्य महासंघले बिहीबार राजधानीमा आयोजना गरेको राष्ट्रिय आर्थिक बहस सुधारका लागि सहकार्य विषयक कार्यक्रममा उनले भने, ‘कच्चा तेलको मूल्यमा भारी वृद्धि, कोरोना महामारी, रुस-युक्रेन युद्ध, बढ्दो बैंक ब्याज र आयातका कारण अर्थतन्त्र समस्या परेको हो, अहिले त आयात व्यापारसमेत घटेको छ ।’
मिश्रले राष्ट्र बैंक निजी क्षेत्रसँग सहकार्य गरेर अघि बढ्ने बताए ।
राष्ट्र बैंकले ब्याजदर घटोस् भनेर नै बैंक दर घटाएको उनले बताए । उनले भने, ‘अहिले आधार दर पनि घटेको छ, राष्ट्र बैंकले केही क्षेत्रमा रिस्ट्रक्चरिङ गर्न दिएको छ, त्यसले पनि धेरै फरक पार्छ ।’
