काठमाडौँ। वैदेशिक रोजगार विभागका अनुसार चालु आर्थिक वर्षको जेठ महिनासम्ममा ६१ वटा नयाँ मेनपावर कम्पनी दर्ता भएको जनाएको छ ।
विभागले ११ महिनाको प्रगति विवरण सार्वजनिक गर्दै वैशाख अन्तिमसम्ममा ५८ वटा र जेठमा ३ वटा नयाँ मेनपावर कम्पनी दर्ता गराएको हो । यो अवधिमा ४३ वटा मेनपावर कम्पनीको खारेजी तथा धरौटी फिर्ता गरिएको विभागले बताएको छ ।
वार्षिक तीन हजार जनासम्म कामदार पठाउने कम्पनीलाई ५० लाख नगद धरौटी र डेढ करोड रुपैयाँको बैङ्क ग्यारेन्टी राख्नुपर्ने कानुनी व्यवस्था छ।
त्यस्तै पाँच हजार जनासम्म कामदार पठाउने कम्पनीलाई एक करोड नगद धरौटी र तीन करोड रुपैयाँको बैङ्क ग्यारेन्टी गर्नुपर्ने कानुनी व्यवस्था छ ।
वार्षिक पाँच हजार जनाभन्दा बढी कामदार पठाउने म्यानपावर कम्पनीलाई दुई करोड नगद धरौटी तथा चार करोड रुपैयाँको बैङ्क ग्यारेन्टी राख्नुपर्ने कानुनी प्रावधान छ । यो वर्ष दर्ता भएका कम्पनीहरूले तीन हजार जनासम्म कामदार पठाउने गरी दर्ता भएका छन् ।
