काठमाडौँ। भन्सार विभागका पूर्व महानिर्देशक तथा सहसचिव शोभाकान्त पौडेल र उपसचिव रामप्रसाद मैनालीलाई अख्तियार दुरुपयोग अनुसन्धान आयोगले पत्र काटेको छ । पौडेल र मैनालीको मिलेमतोमा भएको भन्सार मूल्याङ्कनको विषयलाई लिएर आयोगले स्पष्टीकरण सोधेको हो ।
उनीहरू विरुद्ध गत वर्ष ग्यास लाइटरको भन्सार मूल्यांकन बढाएको विषयमा अख्तियार दुरुपयोग अनुसन्धान आयोगमा उजुरी परेको थियो । अन्तर्राष्ट्रिय बजार मूल्य नबढेको अवस्थामा एक्कासि तत्कालीन भन्सार विभागको नेतृत्वले बदनीयतपूर्वक भन्सार मूल्यांकन बढाएको भन्दै उजुरी परेको हो।
अख्तियारले सोही उजुरीलाई आधार मानेर अर्थ मन्त्रालय माफर्त पत्र काटेको पाएको छ । सामान्यतः मूल्यांकन बढाउने विषय बजार मूल्यसँग नै सम्बन्धित हुन्छ । तर पौडेल र मैनालीको मिलेमतोमा भने ग्यास लाइटरको केसमा विभाग र मातहतको कार्यालयले नेपालको आयात निर्यातको व्यवस्थालाई नै धज्जी उडाएर मूल्यांकन बढाएको आयोगको निष्कर्ष छ ।
