काठमाडौँ । सामाजिक सुरक्षा कोषको छैटौँ वर्षमा प्रवेशको अवसरमा बोल्दै नेपाल उद्योग वाणिज्य महासंघका अध्यक्ष चन्द्र प्रसाद ढकालले सामाजिक सुरक्षा कोषमा संकलन भएको रकमलाई उत्पादनमा लगानी गर्नुपर्ने बताएका छन्।
अध्यक्ष ढकालले सामाजिक सुरक्षा कोषमा ४५ अर्ब फण्ड संकलन भएकोले यसलाई उत्पादनमा लगानी गर्नुपर्नेमा जोड दिए । सामाजिक सुरक्षा कोषमा आबद्ध हुनेको सङ्ख्या बढ्दै छ, हाल यस्तो कोषमा ४५ अर्ब फण्ड संकलन भएको छ।
अब उक्त फण्डलाई बैंकमा राखेर ब्याज खानुभन्दा उत्पादनमा लगानी गर्नुपर्छ’–ढकालले भने ।
लगानीका लागि सरकारलाई कार्यविधि बनाउन अध्यक्ष ढकालले आग्रह समेत गरेका छन् ।
कोषमा हालसम्म ९ लाख २८ हजार ४५३ जना योगदानकर्ता रहेका छन् । कोषमा हाल १८ हजार ४३९ रोजगारदाता सूचीकृत भएका छन् । कोषले हालसम्म विभिन्न सुविधा अन्तर्गत ६ अर्ब ४४ करोड रुपैयाँ प्रदान गरेको छ।
