काठमाडौँ। बुधवार बिहान काठमाडौँस्थित त्रिभुवन विमानस्थलमा सौर्य एयरलाइन्सको जहाज दुर्घटना भएको छ । दुर्घटनाग्रस्त जहाजबाट आगो सहितको धुवाको मुस्लो फैलिएको छ ।
जहाज आन्तरिक तर्फको विमानस्थलमा दुर्घटना भएको हो । उक्त जहाज उड्ने क्रममा दुर्घटनाग्रस्त हुन पुगेको हो ।
सौय एयरलाइन्सको ९एन–एएमपी कल साइन दर्ता नम्बर भएको विमान दुर्घटना भएको हो । उक्त विमान काठमाडौँबाट पोखराका लागि उड्न लागेको थियो । जहाजमा १९ यात्रु रहेको एयरलाइन्सले जानकारी दिएको छ ।
सुरक्षाकर्मीहरूको टोलीले नियन्त्रणको प्रयास गरिरहेका छन् ।’आगो निभाउने क्रममा वरपर धूवाँको मुस्लो फैलिन पुगेको छ। मानवीय क्षति भएको तर कति भन्ने एकिन जानकारी आउन बाकी रहेको आर्थिक भ्वाइससँग विमानस्थलका एक कर्मचारीले भने ।
दुर्घटनापछि अहिले उद्धार जारी छ। प्रारम्भिक जानकारीअनुसार अहिले अग्नि नियन्त्रकहरूले चार जनाको शव निकालेका छन् । विमानमा सवार अन्यको अवस्थाबारे आधिकारिक विवरण आउने क्रममा छ ।
