काठमाडौँ । नेपाल राष्ट्र बैंकको आर्थिक वर्ष २०७९–८० मा नाफा ४१.३४ प्रतिशतले बढेको छ । राष्ट्र बैंकका गभर्नर महाप्रसाद अधिकारीले बिहीबार अर्थमन्त्री समक्ष बुझाएको आर्थिक वर्ष २०७९–८० को वार्षिक प्रतिवेदन अनुसार बैंकको नाफा ८७ अर्ब माथि पुगेको हो ।
मुलुकको एक मात्र केन्द्रीय बैंकले आर्थिक वर्ष २०७९–८० मा ८७ अर्ब ६० करोड ३७ लाख ४५ हजार ४४८ रुपैयाँ खुद मुनाफा आर्जन गरेको छ ।
गत आवमा राष्ट्र बैंकले वैदेशिक मुद्राबाट प्राप्त ब्याजबाट ४८ अर्ब ३६ करोड ६० लाख र स्वदेशी मुद्राबाट १५ अर्ब ४३ करोड ७ लाख रुपैयाँ आम्दानी गरेको छ । यो अघिल्लो आवको तुलनामा क्रमशः १५८.१४ र २.९७ प्रतिशत धेरै हो ।
वैदेशिक मुद्राबाट प्राप्त ब्याजमा सुधार आएसँगै बैंकको कुल सञ्चालन आम्दानी ३५ अर्ब ८७ करोड २१ लाखबाट बढेर ६६ अर्ब ९२ करोड ७१ लाख पुगेको छ । यस्तो सुनको पुनःमुल्याङ्कनबाट १७ अर्ब ११ करोड तथा वैदेशिक मुद्राको पुनःमुल्याङ्कनबाट १० अर्ब बराबरको आय भएको हो ।
बिहीबार भएको उक्त भेटवार्तामा गभर्नर अधिकारी र अर्थमन्त्री महत बिच मुलुकको वर्तमान आर्थिक तथा वित्तीय स्थितिबारे छलफल भएको छ ।
