काठमाडौँ । यहाँ गुल्मीको मुसिकोट नगरपालिकामा सहकारीमार्फत मकैको पीठो ब्रान्डिङ गरेर बजारीकरण गरिएको छ । मुसिकोट नगरपालिका–३ स्थित साना किसान कृषि सहकारी संस्थाले बडागाउँ फेदीमा स्थापना गरेको खाद्य प्रशोधन उद्योगबाट मकैको पीठो उत्पादन गरिएको हो ।
साना किसान कृषि सहकारी संस्थाका अध्यक्ष हरि छन्तेलले बजारमा मकैको पीठोको माग बढ्न थालेको बताउनु भएको छ । राष्ट्रिय कृषि आधुनिकीकरण कार्यक्रम कार्यान्वयन इकाइ गुल्मीले उद्योगका लागि केही उपकरण अनुदानमा सहयोग गरेको छ ।
साना किसान सहकारीले किसानहरुको मकै प्रतिपाथी रु २०० मा खरिद गरी प्रशोधन, लेबलिङ र प्याकेजिङ गरेर बजारमा पुर्याउने गरेको छ । अहिले मकैको पीठो प्रतिकिलोे रु १३० मा बिक्री भइरहेको छ भने सहकारीले २५ किलोको बोरामा पनि पीठो प्याकेजिङ गरेको छ ।
यस वर्ष झण्डै ३५ टन मकैको पीठो बिक्री गर्ने लक्ष्य सहकारीले लिएको उक्त सहकारी संस्थाका व्यवस्थापक विवेक पेमीले जानकारी दिनुभयो । करिब ३०० किसान यस सहकारीमा आबद्ध रहेका छन् । रासस
