काठमाडौँ । ईपीएस कोरिया शाखामा सयौँ युवाले धर्ना तथा नारा जुलुस गरिरहेका छन् । ललितपुरको ग्वार्कोस्थित ईपीएस कोरिया शाखामा सयौँ युवाले धर्ना तथा नारा जुलुस गरेका हुन् ।
रोजगारीका लागि दक्षिण कोरिया जान पाउनुपर्ने मागसहित उनीहरु धर्ना दिन पुगेका हुन् । नारा जुलुस गर्नेहरु ईपीएस कोरिया भाषा परीक्षा पास गरेर पनि कोरिया जान नपाएकाहरु छन् ।
उनीहरु एक पटक कोरिया पुगेर फर्किएका र पुनः भाषा परीक्षा दिएर सूचीमा रहेकाहरु रहेका छन् ।
दक्षिण कोरियाका रोजगारदाताले एक पटक कोरिया पुगेर आएका भन्दा पनि नयाँ कामदार लैजाने गरेपछि यसअघि नै कोरियामा काम गरेर फर्किएकाहरु रोजगारदाताको रोजाइमा नपरेका हुन् ।
नेपाली श्रमिकको संख्या बढिरहेका बेला यसरी गएर फर्किएका र भाषा परीक्षा दिएर सूचीमा रहेका भने ५ प्रतिशत पनि जान पाएका छैनन् ।
