काठमाडाैं । जिल्ला प्रशासन कार्यालय कास्कीले खर्चिलो तीज विशेष कार्यक्रम नगर्न अनुरोध गरेको छ । प्रशासन कार्यालयले खर्चिलो तथा भड्किलो तरिकाले तीज विशेष कार्यक्रम नगर्न जिल्लाबासीहरूमा अनुरोध गरेको हाे ।
प्रशासनले एक सूचना जारी गर्दै स्वीकृतिबीना सार्वजनिक स्थल, पार्टी प्यालेसमा रकम संकलन गर्ने उद्देश्यले मेला–महोत्सव नगर्न पनि निर्देशन दिएको छ ।
तीज पर्व मनाउने नाममा विभिन्न तडकभडकसहितका खर्चिला तथा भड्किला कार्यक्रम गर्ने परिपाटी मौलाउँदै गएपछि त्यसले विभिन्न विकृति र सामाजिक अपराधलाई प्रोत्साहन पुगेको भन्दै प्रशासनले जिल्लाबासीलाई सचेत बनाएको हो ।
सूचनाविपरीत गरे–गराएमा प्रचलित कानुन बमोजिम कारबाही गर्ने समेत प्रशासन कार्यालयले जनाएको छ ।
