काठमाडौं । अविरल वर्षाका कारण चार दिनदेखि रोकिएको खाना पकाउने एलपी ग्यासको आपूर्ति पुनः सञ्चालनमा आउन थालेको छ । पृथ्वी राजमार्ग खुलेसँगै भारतबाट ग्यास बोकेर आएका बुलेटहरू काठमाडौं उपत्यकातर्फ अघि बढ्न थालेका छन् ।
असोज ८ गते रातिदेखि मौसम प्रतिकूल हुनुका साथै सडक अवरुद्ध भएपछि काठमाडौंमा एलपी ग्यास ल्याउने मुख्य मार्ग नै बन्द भएको थियो । त्यसका कारण उपत्यका र आसपासका क्षेत्रका लागि आउने ग्यासका बुलेटहरू बाटोमै रोकिएका थिए ।
पृथ्वी राजमार्ग सञ्चालनमा आएपछि रोकिएका बुलेटहरू गन्तव्यतर्फ अघि बढ्न थालेका हुन् । नेपाल आयल निगमका प्रवक्ता मनोजकुमार ठाकुरका अनुसार सोमबार मात्रै १०५ भन्दा बढी ग्यास बुलेट काठमाडौंका लागि हिँडिसकेका छन् ।
उनका अनुसार साँझसम्म थप बुलेटहरू पनि काठमाडौं आउने क्रममा छन् । राजमार्ग खुलेपछि बाटोमा रोकिएका बाँकी ग्यास बुलेटसमेत क्रमशः उपत्यका भित्रिने निगमले जनाएको छ ।
भोलिदेखि रिफिलिङ तीव्र बनाइने
काठमाडौं भित्रिएका ग्यास बुलेटबाट भोलिदेखि बोटलिङ प्लान्टमा सिलिन्डर भर्ने काम तीव्र पारिने भएको छ ।
निगमका अनुसार बुलेटहरू नियमित रूपमा भित्रिन थालेपछि बोटलिङ प्लान्टमा ग्यास रिफिलिङ बढाइनेछ । त्यसपछि ग्यास सिलिन्डर बजार तथा उपभोक्तासम्म पुर्याउने प्रक्रिया पनि सहज हुनेछ ।
चार दिनसम्म मुख्य राजमार्ग अवरुद्ध हुँदा काठमाडौं उपत्यकामा ग्यासको आपूर्ति प्रभावित भएको थियो । अहिले पृथ्वी राजमार्ग खुलेर ग्यास बोकेका बुलेटहरू आउन थालेसँगै बजारमा देखिएको अभाव क्रमशः हट्दै जाने अपेक्षा गरिएको छ ।
निगमले रोकिएका सबै बुलेट काठमाडौं भित्रिएपछि आपूर्ति प्रणाली सामान्य अवस्थामा फर्किने जनाएको छ ।
