काठमाडौँ । काठमाडौँ उपत्यकाका उपभोक्ताले अब फरक–फरक ब्रान्डका खाली सिलिन्डर साटेर खाना पकाउने एलपी ग्यास लिन पाउने भएका छन् । चाडपर्वका बेला आफ्नो सिलिन्डरको ब्रान्डअनुसार ग्यास खोज्नुपर्ने बाध्यता हटाउन नेपाल एलपी ग्यास उद्योग सङ्घले विशेष व्यवस्था गरेको हो ।
सङ्घका अनुसार असोज २५ गते आइतबारदेखि असोज ३१ गते शनिबारसम्म काठमाडौँ उपत्यकाका ६ स्थानबाट ग्यास बिक्री तथा सिलिन्डर साटफेर सेवा सञ्चालन हुनेछ । नेपाल आयल निगमको समन्वय र ग्यास विक्रेता महासङ्घको सहकार्यमा सञ्चालन हुने यी केन्द्रबाट बिहान ९ः३० बजेदेखि अपराह्न ४ः३० बजेसम्म सेवा लिन सकिनेछ ।
सङ्घका अध्यक्ष दिवान चन्दले जारी गरेको विज्ञप्तिमा चाडपर्वका बेला एउटा ब्रान्डको खाली सिलिन्डर लिएर अर्को ब्रान्डको ग्यास किन्न नपाउँदा उपभोक्ताले समस्या भोग्नुपरेको गुनासो आएपछि यस्तो व्यवस्था गरिएको उल्लेख छ ।
उपत्यकाका ६ स्थानमा सिलिन्डर साटफेर
सङ्घले ग्यास बिक्री तथा सिलिन्डर साटफेरका लागि उपत्यकाका विभिन्न ६ स्थान तोकेको छ ।
१. सिफलचौर, काठमाडौँ
उपलब्ध ब्रान्ड : एभरेस्ट र सुगम
सम्पर्क : ९८०१०९१२७७
२. पेप्सीकोला, काठमाडौँ
उपलब्ध ब्रान्ड : सगर ग्यास
सम्पर्क : ०१–५१५६२७४
३. बालाजु औद्योगिक क्षेत्रको गेट अगाडि, काठमाडौँ
उपलब्ध ब्रान्ड : नेपाल, एचपी, गीता, राजधानी र त्रिवेणी
सम्पर्क : ९८०२९५०४१७
४. सुकेधारा, काठमाडौँ
उपलब्ध ब्रान्ड : बाबा र श्री ग्यास
सम्पर्क : ९८५१११३७०४
५. कलङ्की, काठमाडौँ
उपलब्ध ब्रान्ड : साईबाबा र श्रीकृष्ण ग्यास
सम्पर्क : ९८५१०६०१९२
६. हरिसिद्धि, ललितपुर
उपलब्ध ब्रान्ड : श्रीराम ग्यास
सम्पर्क : ९८५११३७७३२
ग्यास आयात नियमित, साटफेरको समस्या समाधान गर्ने प्रयास
नेपाल एलपी ग्यास उद्योग सङ्घले भारतका विभिन्न रिफाइनरीबाट ग्यास आयात नियमित भइरहेको जनाएको छ । सङ्घका अनुसार गत भदौ महिनामा मात्रै ४२ लाख १३ हजार ६६१ सिलिन्डर ग्यास बिक्री वितरण भएको थियो ।
ग्यासको आपूर्ति नियमित रहे पनि चाडपर्वका समयमा फरक ब्रान्डका सिलिन्डर साट्न नपाउँदा उपभोक्तालाई समस्या हुने गरेको सङ्घको भनाइ छ । त्यसैले निश्चित स्थानबाट सिलिन्डर साटफेर तथा ग्यास बिक्रीको व्यवस्था गरिएको हो ।
यो व्यवस्थाले दसैँलगायत चाडपर्वका बेला ग्यास खोज्न र खाली सिलिन्डर साट्न उपभोक्ताले भोग्दै आएको झन्झट कम गर्ने अपेक्षा गरिएको छ । सेवा लिनुअघि उपभोक्ताले आफूलाई आवश्यक पर्ने ब्रान्ड उपलब्ध हुने केन्द्रमा सम्पर्क गरेर जानकारी लिन सक्नेछन् ।
