विश्वका दुई सबैभन्दा ठूला अर्थतन्त्रले एकअर्काका आयातमा थुप्रै भन्सार शुल्क लगाउँदा बढ्दै गएको व्यापार तनाव समाधान गर्न चीनले अमेरिकालाई ‘वार्ता’ गर्न आह्वान गरेको छ।
‘चीन र अमेरिकाले आर्थिक र व्यापारिक क्षेत्रमा मतभेद र विवादप्रति सकारात्मक र सहयोगी मनोवृत्ति अपनाउनुपर्छ भनी चीनले सधैँ वकालत गर्दै आएको छ’, वाणिज्य मन्त्रालयका प्रवक्ता हे योङकियानले बिहीबार साप्ताहिक पत्रकार सम्मेलनमा भने, “तर कुनै पनि प्रकारका सञ्चार र परामर्श आपसी सम्मान, समानता र आपसी फाइदामा आधारित हुनुपर्छ भन्ने कुरामा जोड दिनुपर्छ, धम्की र डर देखाउनाले मात्र प्रतिकूल परिणाम ल्याउन सक्छ। संयुक्त राज्य अमेरिका र चीनले संवाद र परामर्शमार्फत समस्या समाधान गर्ने सही मार्गमा फर्कन सँगै काम गर्नेछन् भन्ने आशा गरिएको छ।’
जनवरीमा अमेरिकाको राष्ट्रपतिमा दोस्रोपटक पदभार ग्रहण गरेयता डोनाल्ड ट्रम्पले घातक फेन्टानिल र सम्बन्धित पूर्ववर्ती रसायनको प्रवाह रोक्न असफल भएको भन्दै चीन, क्यानडा र मेक्सिकोलगायत प्रमुख व्यापारिक साझेदारविरुद्ध भन्सार शुल्क लगाएका छन्।
यसै महिना ट्रम्पले चिनियाँ उत्पादनमा लगाएको १० प्रतिशत भन्सार बढाएर २० प्रतिशत पुर्याएका छन्।
जवाफमा चीनले पनि सोयाबिन, सुँगुरको मासु र कुखुरासहितका अमेरिकी कृषि वस्तुमा १५ प्रतिशतसम्म कर लगाएको छ।
विश्वको शीर्ष इस्पात उत्पादक चीनले पनि बुधबार इस्पात र एल्युमिनियम आयातमा अलग(अलग नयाँ अमेरिकी भन्सार शुल्कको प्रतिक्रियामा आफ्नो हितको रक्षा गर्न ‘सबै आवश्यक उपाय’ अपनाउने प्रतिबद्धता जनाएको छ। राससरएएफपी
