काठमाडौँ- पुरुष विश्वकपको टोली संख्या विस्तार गर्ने घोषणा गर्दा धेरै फुटबल समर्थकहरूले ४८ टोलीको प्रतियोगितामा साना र लगभग अपरिचित राष्ट्रहरूले स्थान भर्ने कल्पना गरेका थिए। यद्यपि थपिएका धेरै टोलीहरू पहिलेदेखि परिचित फुटबल राष्ट्र थिए। यस वर्षको विश्वकपमा चार टोलीले पहिलो पटक सहभागिता जनाउँदैछन्। २०२६ फिफा विश्वकप बिहीबार रातिबाट सुरु हुँदै छ। पहिलो खेलमा आयोजक मेक्सिकोले मेक्सिको सिटीस्थित एस्तादियो एट्ज्टेकामा दक्षिण अफ्रिकासँग उद्घाटन खेल खेल्नेछ।
यहाँ ती चार नयाँ टोली र तिनबारे जान्नुपर्ने मुख्य जानकारी प्रस्तुत गरिएको छ :
केप भर्डे
‘ब्लु सार्क्स’ भनेर चिनिने केप भर्डे पोर्चुगाली अन्वेषकहरूले बसोबास गराएको टापुहरूको शृंखलाबाट बनेको राष्ट्र हो। टोलीका प्रशिक्षक बुबिस्ता स्वयं पूर्वडिफेन्डर हुन् तर उनले राष्ट्रिय टोलीलाई अफ्रिकी छनोट चरण पार गराएर पहिलो पटक विश्वकपमा पुर्याएपछि राष्ट्रिय नायक बनेका छन्।
उनको टोलीले विश्वकप छनोटका १० मध्ये सात खेल जित्यो। नोभेम्बर २०२५ मा राजधानी प्रायामा बलियो प्रतिद्वन्द्वी क्यामरुन राष्ट्रिय फुटबल टोलीविरुद्ध १–० को जित हासिल गर्दै समूहको शीर्ष स्थान सुरक्षित गर्यो।
केप भर्डेले विदेशमा जन्मिएका योग्य खेलाडीहरूलाई टोलीमा समावेश गरेर आफ्नो शक्ति बढाएको छ। अमेरिकाको फिलाडेल्फियामा जन्मिएका गोलकिपर सीजे डस सान्तोस तथा लक्जेम्बर्गमा जन्मिएका पीएसजीका युवा प्रतिभा फाबियो डोमिंगोस यसका उदाहरण हुन्।
यद्यपि टोलीको मुख्य आधार आक्रमणकर्ता रायन मेन्डेस, सेन्टर ब्याक डाइनी र स्टेभेन मोरेइरा जस्ता अनुभवी खेलाडीहरू हुन्। केप भर्डेले जुन १५ मा स्पेनविरुद्ध विश्वकप यात्रा सुरु गर्नेछ। त्यसपछि उसले उरुग्वे र साउदी अरेबियासँग खेल्नेछ।
कुरासाओ
विश्वकपमा छनोट हुने अहिलेसम्मकै सबैभन्दा सानो राष्ट्र कुरासाओको जनसंख्या करिब १ लाख ५० हजार छ। व्यावसायिक बेसबल खेलाडी उत्पादनका लागि प्रसिद्ध यो राष्ट्रले यसपटक फुटबलमा पनि आफ्नो पहिचान स्थापित गरेको छ।
अक्टोबर २०२५ मा घरेलु मैदानमा जमैकाविरुद्धको जितले विश्वकप छनोटको अन्तिम चरण सहज बनायो। किङ्स्टनमा भएको निर्णायक खेलमा बराबरी पर्याप्त भएकाले कुरासाओले गोलरहित बराबरी खेल्दै विश्वकप टिकट सुरक्षित गर्यो।
कुरासाओ नेदरल्यान्ड्सको एक घटक राष्ट्र हो। त्यसैले टोलीका अधिकांश खेलाडी युरोपमा जन्मिएका र डच फुटबल एकेडेमीमा प्रशिक्षित छन्।
लिएन्ड्रो बाकुना, उनका भाइ जुनिन्हो बाकुना तथा गोलकिपर एलोय रुम लामो समयदेखि राष्ट्रिय टोलीका मुख्य आधार हुन्। छनोट अभियानमा सेन्टर ब्याक आर्मान्डो ओबिस्पो र फरवार्ड सोन्त्जे हेन्सेन थपिएपछि टोली झन् बलियो बनेको थियो।
पारिवारिक स्वास्थ्य समस्याका कारण जिम्मेवारी छाडेका अनुभवी प्रशिक्षक डिक एड्भोकाट पुनः टोली सम्हाल्न फर्किएका छन्। ७८ वर्षीय एड्भोकाट विश्वकप इतिहासकै सबैभन्दा उमेरदार प्रशिक्षक बन्नेछन्।
कुरासाओले पहिलो खेलमा जर्मनीको सामना गर्नेछ। त्यसपछि इक्वेडर र आइभोरी कोस्टसँग खेल्नेछ।
जोर्डन
२०२३ को एएफसी एसियन कप २०२३ को फाइनलसम्मको अप्रत्याशित यात्रापछि जोर्डनमा अपेक्षा निकै बढेको थियो र प्रशिक्षक जमाल सेल्लामीको टोलीले ती अपेक्षाहरू पूरा गर्यो।
विश्वकप छनोटको तेस्रो चरणमा जोर्डन दुई खेलमा पराजित भयो- एकपटक दक्षिण कोरियासँग र अर्को पटक इराकसँग।
टोली अझै पनि घरेलु लिगका खेलाडीमा निर्भर छ। कप्तान मुसा अल-तामारी फ्रान्सको शीर्ष लिगमा नियमित खेल्ने खेलाडी हुन्। टोलीमा अन्य एसियाली लिगमा खेलिरहेका केही प्रतिभाशाली खेलाडी पनि छन्।
जोर्डनले समूह चरणमा अस्ट्रिया, अल्जेरिया र साविक विजेता अर्जेन्टिनासँग प्रतिस्पर्धा गर्नेछ।
उज्बेकिस्तान
युवा स्तरमा लगातार सफलता हासिल गरेपछि उज्बेकिस्तानले अन्ततः सिनियर स्तरमा पनि ठूलो उपलब्धि हासिल गर्दै विश्वकपमा स्थान सुरक्षित गर्यो। उत्तर अमेरिकामा हुने प्रतियोगिताको टिकट पक्का गर्ने क्रममा उसले अन्तिम छनोट चरणमा केवल एक खेल मात्र गुमायो।
अन्तर्राष्ट्रिय स्तरमा सबैभन्दा चर्चित नाम अब्दुकोदिर खुसानोभ हुन्, जो नियमित रूपमा म्यानचेस्टर सिटीको रक्षापङ्क्तिमा देखिन्छन्।
समर्पित फुटबल समर्थकहरूले देशका सर्वाधिक गोलकर्ता एल्डोर सोमुरोदोभलाई पनि चिन्न सक्छन्। उनी हाल टर्कीमा खेल्छन्। यसअघि इटालीको शीर्ष लिग सिरी एमा लामो समय सक्रिय थिए।
उज्बेकिस्तानलाई विश्वकपमा पुर्याउने प्रशिक्षक तिमुर कपाद्जे थिए। तर प्रतियोगिता नजिकिँदै जाँदा उनको स्थानमा विश्व फुटबलको ठूलो नाम फाबियो क्यानाभारोलाई नियुक्त गरियो।
क्यानाभारोले अक्टोबर २०२५ मा टोलीको जिम्मेवारी सम्हालेका थिए। त्यसयता अन्तर्राष्ट्रिय खेलहरूमा टोलीको नेतृत्व गरिरहेका छन्।
उज्बेकिस्तानले प्रतियोगिताको थालनी मेक्सिको सिटीमा कोलम्बियाविरुद्ध खेल्दै गर्नेछ। त्यसपछि अमेरिकामा पोर्चुगल र डिआर कंगोविरुद्ध प्रतिस्पर्धा गर्नेछ।
