काठमाडौं । शिवम् सिमेन्ट्स लिमिटेडको सहायक कम्पनी श्री शिवम् होल्डिङ्स लिमिटेडको चौथो वार्षिक साधारण सभा कम्पनीका सञ्चालक समितिका अध्यक्ष श्री शिवरतन शारडा ज्यूको अध्यक्षतामा आज सम्पन्न भएको छ ।
सभाले आर्थिक वर्ष २०८१/०८२ का लागि शेयरधनीहरूलाई रु. ११ करोड ६० लाख (रु. ११,६०,००,०००) बराबरको नगद लाभांश वितरण गर्ने प्रस्ताव पारित गरेको छ।
यस कम्पनीले आर्थिक वर्ष २०७८/०७९ देखि लगातार चौथो पटक (२०८१/०८२ सम्म) शेयरधनीहरूलाई लाभांश वितरण गर्दै आएको छ। कम्पनीको हालको चुक्ता पूँजी रु. ४ अर्ब ६४ करोड रहेको छ। साथै, कम्पनीले २० प्रतिशत बराबरको रु. १ अर्ब १६ करोड मूल्यका शेयरहरू सर्वसाधारणमा प्रिमियम मूल्यमा निष्कासन गर्नका लागि नेपाल धितोपत्र बोर्डमा निवेदन दर्ता गरिसकेको र हाल स्वीकृतिको प्रतिक्षामा रहेको जानकारी गराइन्छ। श्री शिवम् होल्डिङ्स लिमिटेडले नेपालको सबैभन्दा ठूलो उत्पादन क्षमता भएको हो.शी शिवम् सिमेन्ट प्रा. लि. मा आफ्नो महत्वपूर्ण शेयर लगानी गरेको छ। उक्त कम्पनीमा ३० प्रतिशत नेपाली (श्री शिवम् होल्डिङ्स लिमिटेड) र ७० प्रतिशत चिनियाँ लगानी रहेको छ। उद्योग गण्डकी प्रदेश, पूर्वी नवलपरासी, विनयी त्रिवेणी गाउँपालिका, सर्दीमा अवस्थित छ ।
उक्त अत्याधुनिक प्रविधियुक्त उद्योगले दैनिक ६,००० मेट्रिक टन क्लिनकर र सिमेन्ट उत्पादन गर्न सक्ने क्षमता राख्दछ। साथै, उद्योगमा प्रयोग भएको मेसिनरीबाट उत्पन्न वेस्ट हीटबाट करिब १२ मेगावाट विद्युत् शक्ति उत्पादन गरी आफैं प्रयोग गरिने व्यवस्था रहेको छ ।
उद्योग हाल पूर्ण क्षमतामा सञ्चालनमा रही पछिल्ला पाँच वर्षदेखि निरन्तर लाभांश वितरण गर्दै आएको छ। यसै सन्दर्भमा, कम्पनीले आफ्ना शेयरधनीहरू, साझेदारहरू र सरोकारवालाहरूलाई निरन्तर विश्वास, समर्थन र सहयोगका लागि हार्दिक धन्यवाद ज्ञापन गर्दछ ।
