काठमाडौँ । शिक्षक आन्दोलन लम्बिँदै गएसँगै अन्योलमा परेको कक्षा १२ को परीक्षा अन्ततः पूर्वनिर्धारित मितिमै सञ्चालन हुने भएको छ। यही वैशाख ११ गतेदेखि कक्षा १२ को परीक्षा हुँदैछ। परीक्षाको व्यवस्थापन सञ्चालन गर्ने शिक्षकहरू सडक आन्दोलनमा भएकाले परीक्षा हुने नहुने बारे अन्यौलता सृजना भएको थियो ।
आज बिहान ८ बजेका लागि बोलाइएको राष्ट्रिय परीक्षा बोर्डको बैठकले कक्षा १२ को परीक्षा निर्धारित समयमै गर्ने निर्णय गरेको हो।
बैठकले सम्पूर्ण जिल्लाका परीक्षा समन्वय समिति मार्फत कक्षा १२ को परीक्षा केन्द्र भएका विद्यालयहरूलाई परीक्षा सञ्चालन गर्न अनुरोध गर्ने निर्णय समेत गरेको छ । यस अगाडि शिक्षा ऐन जारी गर्न माग गर्दै आन्दोलित भएको शिक्षक महासंघले १२ को परीक्षामा सहभागी नहुने निर्णय गरेका थिए । अन्य आन्दोलनको सन्दर्भमा भने कुनै छलफल नभएको बैठकमा सहभागी एक प्रतिनिधिले जानकारी दिएका छन् ।
