काठमाडौँ । बिहीबार रातिबाट लगातार परेको वर्षाका कारण बागमती नदीले खोकना क्षेत्रमा खतराको तह पार गरेको छ।
शुक्रवार साँझ पानीको तह ४ दशमलव ८० मिटर बढेर खतराको तह पार गरेको जल तथा मौसम विज्ञान विभागको बाढी पूर्वानुमान शाखाले जनाएको सूचना प्रकाशन गर्दै सतर्कता अपनाउन आग्रह गरेको हो ।
देशभर सक्रिय मनसुनका कारण बागमतीका साथै पर्सा खोला महेशपुर, सिन्धुपाल्चोक मेलम्चीको नवकोटे, पूर्व पश्चिम राजमार्गमा रहेको नवकोटे खोलामा बाढी खतराको तहमा पुगेको बाढी पूर्वानुमान शाखाले जानकारी दिएको छ ।
आईतवारसम्मै मौसम सक्रिय भएको कारण ती नदी तथा खोला आसपास बस्ने स्थानीय बासिन्दालाई सतर्क रहन विभागले आग्रह गरेको छ।
साथै देशभरका ४४ वटा खोला तथा नदीमा बाढीको मात्रा अत्यधिक बढिरहेको कारण उच्च सतर्कता अपनाउन विभागले आग्रह गरेको हो ।
