काठमाडौँ । वीरगन्जको ब्रह्मचोकस्थित नबिल बैंकको बाइपास शाखामा रकम चोरी गरेको आरोपमा तीन जना पक्राउ परेका छन्। उनीहरु भारतको बिहार स्थित मोतीहारी जिल्लामा पक्राउ परेका हुन ।
पक्राउ पर्नेमा झरोखर थाना क्षेत्रका मन्टु कुमार, अर्जुन कुमार र दरपा थाना क्षेत्रकी सबिता देवी छन् । मोतीहारी जिल्लाको दरपा थाना क्षेत्र अन्तर्गत तिनकोनी गाउँबाट १८ लाखभन्दा बढी नेपाली रुपैयाँ तथा चोरीमा प्रयोग गरिने विभिन्न उपकरण समेत बरामद भएको छ।
यस्तै, एकथान घरेलु हतियार नलकटुवा, दुईथान गोली, लुटपाटको रकमबाट खरिद गरिएको एउटा सुनको औँठी, मोटरसाइकल र दुई थान मोबाइल, ड्रिल मेसिन, सिसिटीभि क्यामरा १ थान, सोल्डिङ मेसिन १ थान भारतीय प्रहरीले बरामद गरेको छ ।
भारतीय प्रहरीसँगको बयानमा उनीहरूले नबिल बैंकको रकम लुटेको स्वीकारेका थिए । गत सोमबार वीरगन्जस्थित नबिल बैंकको शाखाबाट १ करोडभन्दा बढी रकम लुटपाट भएको थियो । उनीहरूले भारतीय बजार ढाकामा दुई वटा पसलमा लुटेको आरोपमा पनि पक्राउ परेका हुन् । उनीहरूले केही दिनअघि एक जना हुन्डी कारोबारीको ४० लाख रुपैयाँ लुटेको समेत स्वीकारेका छन् ।
