काठमाडौं। नेशनल लाइफको वार्षिक साधारण सभा सोमवार सम्पन्न भएको छ। कम्पनीको ३५औं वार्षिक साधारण सभा कम्पनीको अध्यक्ष प्रेमा सिंहको अध्यक्षतामा सम्पन्न भएको हो ।
सभामा अध्यक्ष सिंहले विश्व अर्थतन्त्रमा रसिया र युक्रेन युद्धका कारण चुनौति थपिएको र नेपालको सन्दर्भमा विशेष गरी तरलताको संकटले बीमा ब्यवसाय चुनौतिपूर्ण भए पनि नियामक निकायले लिएको विभिन्न कदमहरुका कारणले बीमाको पहुँचमा उल्लेखनीय बृद्धि भएको बताइन् । उनले नेपाल सरकार र नियामक निकायको सहयोगात्मक नीतिहरुका कारणले गर्दा बीमा बजार आउने दिनहरुमा थप फस्टाउने आशा पनि व्यक्त गरिन् ।
साधारण सभाले आर्थिक वर्ष २०७८/ ०७९ को लागि अद्यावधिक चुक्तापूँजीको ८ प्रतिशत वोनस शेयर जारी गर्ने र सो वोनस शेयर वापतको कर प्रयोजनको लागि १ करोड ९५ लाख ३८ हजार ६६१ रुपैयाँ नगद लाभांश प्रदान गर्ने प्रस्ताव पारित गरेको छ । उक्त लाभांशको अतिरिक्त चुक्तापूँजीमा ६ दशमलव ५ प्रतिशतको दरले थप नगद लाभांश प्रदान गर्ने प्रस्ताव पनि सभाबाट पारित भएको छ ।
उक्त अवसरमा कम्पनीको कल बीमाशुल्क १५ प्रतिशतले बृद्धि भई १ हजार ४४० दशमलव ७६ करोड रुपैयाँ पुगेको जानकारी दिइयो । साथै सोही अवसरमा एक सहायक लगानी कम्पनी स्थापना गर्ने तर्फ पनि आर्थिक वर्ष २०७९/ ०८० मा प्रक्रिया अगाडि बढाइने जानकारी दिइयो।
